Claude навучыўся весці бухгалтэрыю, маркетынг і продаж для малога бізнесу

Новы сэрвіс працуе праз Claude Cowork, платформу Anthropic для аўтаматызацыі задач. Карыстальнік уключае Claude for Small Business, падключае патрэбныя сервісы (QuickBooks, PayPal, HubSpot, Canva, Docusign, Google Workspace і Microsoft 365) і абірае задачу.

Усяго Claude for Small Business уключае 15 гатовых агентных сцэнараў для фінансаў, аперацый, продажаў, маркетынгу, HR і кліенцкага сервісу. Чат-бот дапаможа з разлікам заробкаў, закрыццём месяца, звяраннем плацяжоў, падрыхтоўкай справаздач, аналізам продажаў, запускам маркетынгавых кампаній, нагадваннямі па рахунках і апрацоўкай лідаў. Пры гэтым Anthropic адзначае: перад адпраўкай, публікацыяй або аплатай карыстальнік павінен пацвердзіць дзеянне.

Для маркетынгу Claude зможа аналізаваць кампаніі ў HubSpot, знаходзіць перыяды слабой выручкі, прапаноўваць промастратэгію і ствараць матэрыялы ў Canva. У Docusign ён зможа адпраўляць дамовы на подпіс, адсочваць статус і захоўваць падпісаныя копіі.

Anthropic асобна робіць акцэнт на даверы і бяспецы. Паводле дадзеных апытання кампаніі, палова ўладальнікаў малога бізнесу назвала абарону дадзеных галоўнай рызыкай пры выкарыстанні ШІ. У Claude for Small Business захоўваюцца існуючыя правы доступу: калі супрацоўнік не бачыць дакумент у QuickBooks або Google Drive, ён не зможа атрымаць яго і праз Claude. Акрамя таго, на тарыфах Team і Enterprise Anthropic па змоўчанні не вучыць мадэлі на дадзеных кліентаў.

«Малы бізнес складае амаль палову амерыканскай эканомікі, але ў яго ніколі не было рэсурсаў буйных кампаній. ШІ — першая тэхналогія, якая нарэшце можа скараціць гэты разрыў», — заявіла сузаснавальніца і прэзідэнт Anthropic Даніэла Амадэй.

Паводле кампаніі, малы бізнес забяспечвае 44% ВУП ЗША і амаль палову працоўных месцаў у прыватным сектары, але ўкараняе ШІ павольней за буйныя карпарацыі. Anthropic лічыць, што гэта адбываецца таму, што інструменты і навучанне рэдка адаптаваныя пад рэальныя працэсы невялікіх кампаній, таму выкарыстанне ШІ часта заканчваецца звычайным чатам.