Беларуска жыве на Кіпры, працуе на Польшчу, але не можа паляцець у Еўропу. Не даюць візы
+1 гісторыя пра нематываваныя адмовы польскіх консульстваў беларусам.
Беларуска, якая жыве на Кіпры, адгукнулася на гісторыі нематываваных адмоў беларусам у польскіх візах і расказала сваю.
— Жыву на Кіпры, працую на польскую кампанію аддалена, маю карту паляка і сваякоў у Польшчы (бабуля, цёткі, сёстры), але не магу паехаць да іх у госці і наогул не магу паехаць у шэнгенскую зону, бо польская амбасада адмаўляе мне ў візе.
Чаму падарожнічаць у шэнген мне няможна, а працаваць там можна
Кіпр уваходзіць у Еўрасаюз, але не ў шэнгенскую зону. З кіпрскім ДНЖ я не магу падарожнічаць па Еўропе.
А вось працаваць там аддалена магу. Будучы ўладальніцай ДНЖ у краіне ЕС, я магу працаваць на еўрапейскія краіны па B2B. Падаткі плачу на Кіпры.
Апошні раз мне выдалі гадавую нацыянальную польскую візу на Кіпры ў 2022 годзе. А сёлета мне двойчы адмовілі — у нацыянальнай і ў турыстычнай. Не дапамаглі ні даведка з працы, ні пацверджанне даходаў, ні карта паляка.
Першую адмову матывавалі тым, быццам сумняваюцца, што я выкарыстоўваю візу па прызначэнні. Другі раз — тым, што я не дала дастатковых пацверджанняў месца пражывання.
Прычым другі раз мяне як быццам наўмысна падставілі. Кантэкст: аддаю дакументы дзяўчыне ў консульстве, размаўляем пра тое, што я люблю журэк і ўсё не дачакаюся, калі ж апынуся ў Польшчы і паем. Кажу ёй, што планую жыць у бабулі, але на ўсялякі выпадак вось рэзервацыя гасцініцы. Яна такая: не, рэзервацыя не патрэбная. А ў адмове потым пішуць, што я не пацвердзіла жытла, хоць у анкеце былі і адрас, і тэлефон прымаючага боку.
Пісала лісты на польскай у МУС Польшчы і консульства Польшчы на Кіпры. Безвынікова. Сказалі: соры, падавайцеся зноў. Адмовы былі не толькі ў мяне.
Ва ўсіх беларусаў з картамі паляка шмат адмоў у шэнгене.
Версіі, чаму так:
1) ім не падабаецца, што пасля 2022 я на Кіпры, а не ў Польшчы;
2) не любяць беларусаў (менавіта польскае консульства на Кіпры);
3) іх там жорстка дзяруць за тое, што раней выдалі шмат віз.
Вырашыла больш не падавацца ў іх. Планую звярнуцца ў нямецкае з запрашэннем ад сястры: у яе ПМЖ у Нідэрландах.
Чаму Кіпр, а не Польшча
На Кіпры лепш. Сонца, сіга-сіга (грэч. «павольна», «не спяшаючыся»), няма кіпішу, лета да сярэдзіны лістапада. І пра вайну тут зусім не чуваць. І так, усе гавораць на англійскай, рускай.
А яшчэ тут увялі закон, у рамках якога, калі працуеш у ІТ, то праз чатыры гады жыцця на Кіпры можаш падавацца на грамадзянства.
Пра што гаворка
У 2024 годзе Кіпр унёс папраўкі ў закон аб грамадзянстве, згодна з якім уладальнікі працоўных віз (і іхнія сямейнікі) могуць падавацца на грамадзянства праз 4 або нават праз 3 гады легальнага пражывання на востраве, у залежнасці ад узроўню ведання грэчаскай мовы (А2 або B1 адпаведна).
Якія працадаўцы пасуюць:
- замежныя кампаніі, якія маюць на Кіпры асобныя офісы;
- кіпрскія суднаходныя кампаніі;
- кіпрскія высокатэхналагічныя і/або інавацыйныя кампаніі;
- кіпрскія фармацэўтычныя кампаніі;
- кіпрскія кампаніі ў галіне біягенетыкі і біятэхналогій;
- кампаніі, зарэгістраваныя ў рэестры замежных кампаній дэпартамента рэгістрацыі і міграцыі.
Заява аб грамадзянстве мае быць разгледжаная на працягу 8 месяцаў.
Нягледзячы на тое, што я працую на польскую кампанію, трапляю пад «правіла чатырох гадоў», дзякуючы мужу.
Зрэшты, планую, калі надыдзе «світанак», вярнуцца ў Беларусь — падымаць ІТ. Найлепшыя мазгі — у нас.
Читать на dev.by