300+ распрацоўшчыкаў гульняў страцілі працу ў адзін дзень за 3 тыдні да Калядаў. Год выдаўся для індустрыі горшым за папярэдні

Больш за ўсіх пацярпела Ubisoft, якая вырашыла згарнуць распрацоўку шутара XDefiant менш чым праз тры месяцы пасля запэўненняў выканаўчага прадзюсара аб тым, што з гульнёй усё ў парадку. Кампанія вырашыла закрыць студыі ў Сан-Францыска і Осацы, а таксама зрэзаць штат у студыі ў Сіднеі. Агулам працы пазбавяцца 277 чалавек: 143 — у Сан-Францыска і 134 — у двух іншых гарадах.

Таксама закрыліся стваральнікі шутара Deceive Inc — канадская студыя Sweet Bandits. Паведамленне з’явілася на яе форуме. Лёс гульні пакуль вырашаецца і можа быць перададзены ў рукі выдаўца Tripwire Interactive. Колькі людзей засталося без працы, не ўдакладняецца, але на сайце Sweet Bandits гаворыцца, што ў камандзе было 18 супрацоўнікаў.

Звальненні правяла яшчэ адная канадская студыя Torn Banner Studios, вядомая гульнямі Chivalry. Аб складаным рашэнні паведаміў яе гендырэктар у LinkedIn. Колькі людзей сыдзе, ён не пазначыў, але супрацоўнікі кажуць, што «шмат», і называюць скарачэнні «масавымі». Штат Torn Banner, паводле інфармацыі на сайце, да звальненняў налічваў 150 чалавек.

Усяго, згодна з Game Industry Layoffs, за няпоўны 2024 год працу ў геймдэве ўжо страцілі 14 тысяч спецыялістаў. Страты галіны за ўвесь 2023 год трэкер ацэньвае мінімум у 10,5 тысяч.