«Ідзе бура»: іміграцыйныя адвакаты ў ЗША раяць замежным айцішнікам вярнуцца ў краіну, перш чым Трамп уступіць на пасаду

Адное з абяцанняў, якія гарантавалі перамогу Трампа, палягала ў дэпартацыі мільёнаў імігрантаў, якія знаходзяцца ў краіне незаконна. Аднак пра яго планы па рэфармаванні сістэмы, якая дазваляе легальна прыцягнуць мноства высокакваліфікаваных спецыялістаў, вядома няшмат. У свой першы тэрмін Трамп абмежаваў доступ да многіх відаў працоўных віз, часткова перакрыўшы важную крыніцу замежных айцішнікаў для ЗША. «Ідзе бура, і гэтым разам мы дакладна ведаем, што яна прынясе», — кажуць юрысты.

У першыя тыдні свайго першага тэрміну Трамп падпісаў указ, які абмежаваў уезд грамадзянам з сямі мусульманскіх краін. Працаўнікі з гэтых краін баяліся выязджаць з ЗША, ці то ў камандзіроўкі, ці то з асабістых прычын, праз рызыкі, што іх не пусцяць назад. У верасні Трамп абяцаў вярнуць той бан і пашырыць яго на ўцекачоў з Газы.

Мінулы раз бан выклікаў гучную незадаволенасць ІТ-кампаній, якім вельмі патрэбныя замежнікі з вузкай экспертызай для стварэння тэхналогій. Тады да пратэсных акцый, якія адбываліся ў аэрапорце Сан-Францыска, далучыліся Сэм Альтман і Сяргей Брын. Той указ цалкам уступіў у сілу з затрымкай большай за год, пакуль не прайшоў шэрагу ніжэйшых інстанцый і не быў падтрыманы Вярхоўным судом.

Юрысты мяркуюць, што Трамп можа ўвесці забарону на ўезд асобам з пэўных краін і цяпер. Падобныя меры, верагодна, зноў будуць аспрэчвацца ў судах, але ўсё роўна створаць праблемы для амерыканскіх працадаўцаў, якім будзе складаней наймаць і ўтрымліваць патрэбныя замежныя кадры. Гэтым разам у няласку могуць трапіць новыя краіны ў залежнасці ад прыярытэтаў новай адміністрацыі — напрыклад, Кітай. Трамп ужо паабяцаў павысіць мыты на тавары кітайскага паходжання, каб падарваць эканоміку азіяцкай краіны. Гэтай мэце можа паслужыць і бан на ўезд з Кітая.

Акрамя таго, Трамп можа абмежаваць доступ да візы H-1B, якая найбольш запатрабаваная ў тэхналагічных кампаній — летась больш за палову гэтых віз атрымалі менавіта супрацоўнікі на пазіцыях, звязаных з ІТ-сферай. У мінулы тэрмін Трампа рэзка пачасціліся адмовы ў першай такой візе і запыты пра дадатковыя дакументы, якія пацвярджаюць права прэтэндаваць на яе. У 2020 годзе адміністрацыя Трампа часова прыпыніла выдачу новых грын-карт і многіх відаў працоўных віз, каб падтрымаць працоўных амерыканцаў на фоне зніжэння занятасці ў пандэмію.

Пры Джо Байдэне некаторыя з тых абмежаванняў былі скасаваныя. У снежні былі апублікаваныя новыя правілы, якія паскараюць апрацоўку заявак па працоўных візах, асабліва ад тых, хто раней ужо атрымліваў візу H-1B. Эксперты адзначаюць, што гэтыя навіны дазваляюць працадаўцам і замежным супрацоўнікам быць спакойнымі, што іх візы будуць падоўжаныя. Але Трамп іх скасуе.

Зрэшты, некаторыя эксперты настроеныя аптымістычней і спадзяюцца, што на Трампа ў гэтым плане зможа паўплываць Ілан Маск — напрыклад, пераканаць яго не мяняць праграмы або нават павялічыць колькасць віз, што выдаюцца.

Лишь половина фаундеров американских единорогов — из США. Откуда остальные?

По теме

Лишь половина фаундеров американских единорогов — из США. Откуда остальные?

У Крэмніевай даліне асцерагаюцца недахопу высокакваліфікаваных кадраў праз іміграцыйную палітыку Трампа

Па тэме

У Крэмніевай даліне асцерагаюцца недахопу высокакваліфікаваных кадраў праз іміграцыйную палітыку Трампа

Маск узначаліць дэпартамент эфектыўнасці дзяржкіравання пры Трампе

Па тэме

Маск узначаліць дэпартамент эфектыўнасці дзяржкіравання пры Трампе