Добкін трапіў у топ лепшых менеджараў Украіны
Украінскі часопіс «Фокус» штогод складае рэйтынг найлепшых кіраўнікоў больш чым у 10 галінах эканомікі краіны. У тройку найлепшых у ІТ-сферы ў 2025 годзе трапіў заснавальнік і генеральны дырэктар EPAM Аркадзь Добкін. Разам з ім у спіс уключаны кіраўнік Ciklum Віталь Нужны і генеральны дырэктар GlobalLogic Срынівас Шанкар.
У картцы Добкіна адзначаецца, што пад яго кіраўніцтвам EPAM вырасла са стартапа да вядучага глабальнага пастаўніка лічбавых паслуг. Таксама ён быў прызнаны адным з самых паважаных кіраўнікоў у рэйтынгу Top CEO Most Loved Workplaces 2024.
З 1 верасня Добкін пакіне пасады генеральнага дырэктара і прэзідэнта EPAM і стане выканаўчым старшынёй рады дырэктараў, засяродзіўшыся на стратэгічным развіцці кампаніі.
Рэйтынг «Фокуса» складзены на аснове апытання галіновых украінскіх і міжнародных спецыялістаў, HR-экспертаў, эканамістаў і ўдзельнікаў рынку. Кандыдаты ацэньваліся па такіх крытэрыях, як узровень публічнасці, прафесійныя дасягненні, асабістая рэпутацыя і ўплывовасць на рынку, дзе прадстаўлена кампанія. Таксама ўлічваўся імідж кампаніі, якую рэпрэзентуе кандыдат, і яе актыўнасць у рэалізацыі праектаў па падтрымцы грамадзянскага насельніцтва і вайсковых на фоне вайны.
Аўтары адзначаюць, што нягледзячы на выклікі, з якімі сутыкаецца украінская ІТ-сфера падчас вайны, напрыклад з падзеннем экспарту паслуг і інфраструктурнымі рызыкамі, 2024 год стаў адным з самых паспяховых і інавацыйных у гісторыі галіны. У 2024 годзе ІТ-індустрыя выплаціла больш за $1 млрд падаткаў, што значна больш у параўнанні з $776 млн даляраў у 2023-м. EPAM у мінулым годзе ўвайшоў у топ найбуйнейшых падаткаплацельшчыкаў «украінскага ПВТ». ІТ-сектар застаецца самым буйным экспарцёрам паслуг ва Украіне, забяспечваючы 38% экспарту паслуг.
Читать на dev.by