Добкін сыходзіць з пасады прэзідэнта і гендырэктара EPAM

EPAM Systems абвясціла, што Аркадзь Добкін — ключавы сузаснавальнік, старшыня, гендырэктар і прэзідэнт кампаніі — з 1 верасня 2025 года пераходзіць на пасаду старшыні савета дырэктараў.

Яго пераемнікам на пасадах генеральнага дырэктара і прэзідэнта кампаніі стане Балаж Фейеш, які цяпер займае пасады прэзідэнта па глабальным бізнесе і дырэктара па даходах.

«На гэтай пасадзе ён засяродзіцца на прасоўванні стратэгічных ініцыятыў і падтрыманні пераемнасці місіі EPAM, паколькі кампанія ўваходзіць у наступную фазу свайго шляху», — гаворыцца ў прэс-рэлізе кампаніі.

Адначасова Добкін «працягне актыўна ўдзельнічаць у фармаванні доўгатэрміновага стратэгічнага курсу EPAM, падтрымліваючы ключавыя адносіны з кліентамі, партнёрамі і інвестарамі, даючы рэкамендацыі па крытычна важных стратэгічных ініцыятывах і прасоўваючы брэнд кампаніі па ўсім свеце».