«Лепш памру, чым стану чыімсьці агентам»: Дураў выступіў на канферэнцыі па правах чалавека

У пачатку свайго выступу Дураў растлумачыў сваё стаўленне да абвінавачанняў у магчымай залежнасці ад нейкіх дзяржструктур:

«Я рускі! І я хутчэй памру, чым стану чыімсьці агентам. І я думаю, што людзі, якія выказваюць такое меркаванне, мала што ведаюць пра мой жыццёвы шлях — пра тое, чым я займаўся да Telegram, якую ролю „ВКонтакте“ і Telegram адыгралі ў абароне свабоды слова і прыватнага жыцця ва Усходняй Еўропе».

Кіраўнік Telegram распавёў пра сваю біяграфію, прычыны продажу «ВКонтакте» па кошце «ніжэй за рынкавага», адмову перадаць ключы шыфравання Telegram расійскім уладам і стварэнне на гэтым фоне руху па абароне свабоды слова Digital Resistance. Ён заявіў, што не ведае, якая яшчэ сацсетка ў рэгіёне зрабіла больш для гэтай мэты: «Мяне моцна абражае, калі людзі кажуць пра „расійскі актыў“».

Абвінавачанні ў супрацоўніцтве з расійскімі сілавікамі ён звязвае з тым, што людзі «аднабока» разумеюць «свабоду слова». Дураў прывёў прыклады, калі мэсенджар паўставаў на яе абарону: пандэмія, рух Black Lives Matter, а таксама розныя мітынгі. Таксама Telegram адмовіўся блакаваць на запыт французскіх праваахоўнікаў канал, створаны «надзвычай радыкальнымі левымі пратэстоўцамі». Дураў таксама нагадаў, што Telegram хутка і без укладанняў у рэкламу стаў папулярным, у тым ліку ў краінах, дзе «канфідэнцыяльнасць пад пагрозай», і распавёў пра магутную DDoS-атаку ў Кітаі, з якой Telegram сутыкнуўся пасля мясцовых пратэстаў.

Адна з ключавых тэм — затрыманне ў Францыі. Дураў сказаў, што моцна здзіўлены, што гэта адбылося: «Мяне абвінавацілі ў саўдзеле ў злачынствах людзей, якія здзяйснялі іх праз Telegram, і людзей, пра якіх я ніколі не чуў і з якімі ніколі не меў зносін». А таксама тым, што Францыя не накіроўвала належных запытаў па злачынствах, бо яны ведаюць яго месца жыхарства ў Францыі, а офіс Telegram у Дубаі наогул знаходзіцца ў адным будынку з французскім консульствам:

«На самай справе гэта [выглядае] яшчэ больш камічна, бо мой асабісты кабінет у офісе ў Дубаі і консульства [Францыі] знаходзяцца ў адным будынку — іх падзяляюць два паверхі. А я таксама быў частым наведвальнікам консульства, у мяне часта былі афіцыйныя сустрэчы з прадстаўнікамі французскіх уладаў, з імі ж я меў зносіны і праз Telegram».

Дураў заявіў, што ў Францыі ў канкуруючых папулярных платформаў тыя ж самыя праблемы, а Telegram больш прасунуты ў пытаннях камунікацыі па запытах ад праваахоўных органаў. Ён сказаў, што можна толькі здагадвацца, чаму французскія ўлады вырашылі пераследаваць менавіта яго, але ўпэўнены, што ўсё з-за таго, што большасць канкурэнтаў абаронены амерыканскімі ўладамі.

Кіраўнік Telegram нагадаў, што мноства інструментаў абароны людзей, якім пагражае пераслед з боку аўтарытарных дзяржаў, мэсенджар прыдумаў і рэалізаваў задоўга да таго, як яны з’явіліся ў іншых мэсенджарах кшталту Signal і WhatsApp:

«Зараз амаль кожная амерыканская кампанія выкарыстоўвае адзін і той жа алгарытм шыфравання. Нямногія разумеюць, што WhatsApp, Facebook, Instagram, Signal або Google выкарыстоўваюць адзін і той жа алгарытм шыфравання, які быў створаны за сродкі фонду, фінансаванага Мінабароны ЗША больш за 10 гадоў таму».

Ён дадаў, што сёння мільярды людзей залежаць ад таго, што можа быць скампраметавана, таму распрацоўшчыкі ўласных алгарытмаў шыфравання «заўсёды будуць падвяргацца крытыцы».

Што тычыцца будучыні Telegram, Дураў сказаў, што на працягу бліжэйшых 10 гадоў мэсенджар можа дасягнуць 3–4 млрд карыстальнікаў. Акрамя таго, бізнесмен анансаваў укараненне новых ШІ-функцый «у бліжэйшыя некалькі дзён».