Алеся Чапкевич world 24 лютага 2026, 11:24

Дурова падазраюць у садзеянні тэрарызму, заведзена крымінальная справа — расійскія СМІ

«Расійская газета» і «Камсамольская праўда» паведамілі пра расследаванне ў дачыненні да Паўла Дурава ў Расіі са спасылкай на матэрыялы мясцовых МУС і ФСБ.

3 каментарыя

Дурова падазраюць у садзеянні тэрарызму, заведзена крымінальная справа — расійскія СМІ

«Расійская газета» і «Камсамольская праўда» паведамілі пра расследаванне ў дачыненні да Паўла Дурава ў Расіі са спасылкай на матэрыялы мясцовых МУС і ФСБ.

Дзеянні заснавальніка Telegram расследуюцца ў рамках крымінальнай справы па частцы 1.1 артыкула 205.1 КК (садзейнічанне тэрарыстычнай дзейнасці).

Выданні пішуць, што з 2022 года колькасць злачынстваў, якія былі здзейснены з выкарыстаннем Telegram, перавысіла 153 тысячы, прычым 33 тысячы маюць дыверсійна-тэрарыстычную і экстрэмісцкую накіраванасць. ФСБ нібыта папярэдзіла 475 тэрактаў, падрыхтоўка якіх нібыта вялася праз месэнджар.

«Камсамольская праўда» сцвярджае, што з выкарыстаннем Telegram былі здзейснены тэракты, у якіх загінулі Дар’я Дугіна, Максім Фамін і 9 высокапастаўленых ваеннаслужачых. А таксама што месэнджар не выканаў патрабаванні Раскамнагляда аб выдаленні прыкладна 155 тысяч каналаў, чатаў і ботаў, якія датычыліся недакладнай інфармацыі, заклікаў да экстрэмізму, судовых рашэнняў і апраўдання экстрэмізму.

У жніўні 2025 года Раскамнагляд аб’явіў аб частковым абмежаванні званкоў у Telegram, а ў гэтым месяцы — аб узмацненні абмежаванняў у дачыненні да месэнджара. Кіраўнік расійскага Мінлічбы Максут Шадаеў адзначаў, што доступ да перапісак у Telegram маюць замежныя службы, але каманда гэта адмаўляе і называе спробай мясцовых уладаў апраўдаць забарону праграмы ў Расіі.