У «дочках» расійскага «Сбербанка» масава звальняюць праграмістаў і распрацоўшчыкаў

Першым пра звальненні паведаміў Telegram-канал «Прафсаюз працаўнікоў IT», якому сталі прыходзіць паведамленні аб звальненнях, якія рыхтуюцца або ўжо пачаліся, ад супрацоўнікаў «дачок» «Сбербанка». Паводле іх слоў, у розных кампаніях скарачэнні чакаюць ад 30% да 50% супрацоўнікаў, прычым закрануць яны і айцішнікаў. Пры канцы 2024 года канал паведамляў, што «Сбер» скарачае бюджэт і спыняе супрацоўніцтва па шэрагу праектаў з аўтсорсінгавымі і даччынымі кампаніямі, уключаючы «Ай-Тэка», «Тэхна Дыясофт», «ІТ Мастарс», SNAP IT, IBS і «Работа.ру».

Адзін з менеджараў Ecom.tech паведаміў выданню, што ў «Куперы» ўжо звольнілі 20% ІТ-спецыялістаў: каля 200 чалавек з 1000. Тлумачаць гэта «эканоміяй бюджэту і ўказаннем зверху».

«Літаральна казалі: пішы два спісы: першая хваля 45%, другая яшчэ 9%, — расказаў супрацоўнік Ecom.tech CNews. — І многія кіраўнікі пісалі». Паводле яго звестак, супрацоўнікі звальняюцца па пагадненні бакоў.

Паводле слоў другога ІТ-спецыяліста Ecom.tech, звальненні пачаліся да 2025 года. У «МегаМаркеце» скараціць могуць да 25% супрацоўнікаў, адзначыў ён. Пры гэтым афіцыйнай аб’явы ад «Сбербанка» няма. «На словах прыходзяць з прапановай сысці па пагадненні бакоў і далей ідуць таргі наконт колькасці акладаў: звычайна два-тры аклады і па пяць-шэсць кіраўнікам», — растлумачыў ён. У «Куперы» пры гэтым «будуць мінімальныя звальненні, бо гэта паспяховейшы прадукт». Суразмоўца CNews сказаў, што ў кампаніі быў «велізарны набор ІТ-спецыялістаў з рынку» пры канцы 2023 — летам 2024 года (каля 1,5 тысяч).

«На пачатку снежня была сустрэча нашага кластара, дзе сказалі, што на загад зверху „аптымізуюць“ кіраванне ў месцах, якія не прыносяць прыбытку», — расказаў CNews суразмоўца сярод распрацоўшчыкаў «Сбертэха». Паводле яго слоў, гаворка пакуль пра адмову ад паслуг тых, хто працуе на аўтсорсінгу (а гэта траціна каманды).

«Аўтсорсінгавыя кампаніі даведаліся, што не падоўжаць дамоў ад снежня за пару тыдняў (да тэрмінаў падаўжэння — заўв. CNews), але супрацоўнікаў у недасведчанасці трымалі да апошняга: мабыць, думалі, разассецца. У выніку яны даведаліся адным днём, што ў іх больш праекта няма», — адзначыў ён. Паводле яго слоў, каманды распрацоўшчыкаў зліваюць разам і пераводзяць праграмістаў на свабодныя пасады, але на ўсіх месцаў не хопіць. «Тыя, хто застаўся пакуль неразмеркаваным па камандах, знаходзяцца без працы (а такіх пакуль пятая частка каманд). Па сутнасці, заробак плацяць, а працы няма», — працягнуў ён.

Наконт прычын Telegram-канал «Прафсаюз працаўнікоў IT» адзначае, што, нягледзячы на высокі попыт, расійскія айцішнікі сутыкаюцца з наступствамі эканамічнай нестабільнасці. Да пачатку масавых скарачэнняў у найбуйнейшых расійскіх ІТ-кампаніях мог прывесці разрыў гандлёвых адносін, падаражанне імпартных тэхналогій і рэкордная ключавая стаўка Цэнтрабанка, якія ўскладнілі планаванне і рэалізацыю доўгатэрміновых ІТ-праектаў.

Другія эксперты звязваюць скарачэнні са зніжэннем патрэбнасці ў пэўных праектах або прадуктах згаданых кампаній, а таксама фокусам на павышэнні аперацыйнай эфектыўнасці. Яны мяркуюць, што скарачэнні ў меншай ступені закрануць вопытных распрацоўшчыкаў, якія па-ранейшаму ў дэфіцыце, і што кампаніі ў асноўным расстаюцца з супрацоўнікамі малодшых грэйдаў або сумежных спецыяльнасцяў.

Трэція асноўнай прычынай звальненняў называюць неакупныя выдаткі на пераацэненых ІТ-спецыялістаў, выкліканыя падзеннем бізнэсу. Таксама сваю ролю адыгрывае дубляванне выдаткаў: уласныя ІТ-аддзелы, аўтсорсінг, аўтстафінг і падрадчыкі-інтэгратары прыводзяць да таго, што сукупныя выдаткі на эксплуатацыю карпаратыўных ІТ-сістэм становяцца эканамічна нявыгаднымі для бізнэсу.

Чацвёртыя таксама кажуць, што на рынак працы ўплывае эканамічная нявызначанасць, трэнд ад наймання да развіцця бягучых каманд і зніжэнне патрэбнасці ў новых кадрах па меры ўкаранення новых тэхналагічных прадуктаў.

Эксперты мяркуюць, што на рынак выйдзе мноства разумных і амбіцыйных спецыялістаў, якія звыкліся да высокага даходу. Паводле іх слоў, дэфіцыт спецыялістаў перакрыецца, але якасць наўрад ці палепшыцца ў кароткатэрміновай перспектыве. Спатрэбіцца перакваліфікацыя, адаптацыя і эфектыўнае чалавекацэнтрычнае камандаўтварэнне, што патрабуе часу і якасных HR-працэсаў, а з гэтым у Расіі «таксама вялікія праблемы».

Тым не менш, паводле іх прагнозаў, агульная колькасць вакансій вырасце, дзякуючы попыту на новыя напрамкі і папулярныя тэхналогіі, такія як АІ, вялікія даныя, воблачныя рашэнні, віртуалізацыя, інфармацыйная бяспека, а таксама на перакрыццё недахопу кадраў у бягучых праектах.