Telegram рыхтуе функцыю платных асабістых паведамленняў і платных каментароў

Аплата будзе здзяйсняцца «зоркамі» — унутранай валютай Telegram, якая была запушчаная ў чэрвені 2024 года. Спаганяць яе за паведамленні ў «прыват» змогуць уладальнікі падпіскі Premium. Плаціць будуць тыя, каго карыстальнік не дадаў у спіс кантактаў або каму ні разу не пісаў. Таксама функцыя прадугледжвае пералік выключэнняў — туды можна дадаць асобных карыстальнікаў і «цэлыя групы». Даты рэлізу пакуль няма.

Ці давядзецца плаціць за кожнае новае паведамленне, ці за першае, ці за доступ да перапіскі на пэўны час, невядома. Мінімальны кошт паведамлення — 1 «зорка», максімальны — 10 тысяч. C кожнай транзакцыі Telegram утрымае камісію ў 15%.

Днямі канал «Код Дурава» знайшоў на тэставым серверы месенджара функцыю платных каментароў. Telegram тэсціруе яе ў публічных групах, прывязаных да каналаў. Як мяркуецца, так адміністратары каналаў змогуць зрабіць паведамленні пад сваімі публікацыямі платнымі.

Ці будуць карыстальнікі плаціць за кожны каментар асобна, ці па падпісцы, незразумела. Тэрміны з’яўлення новай опцыі таксама невядомыя.