EPAM бясплатна дапамагае ўкраінскім вайскоўцам «увайсці ў айці»

Навучанне займае некалькі тыдняў і праходзіць анлайн. Ініцыятыва разлічана ў тым ліку на тых, у каго няма досведу ў сферы, а таксама не прывязана да ўзросту і геаграфіі ўдзельнікаў.

Праграма складаецца з двух модуляў. Першы прысвечаны асновам ІТ і ахоплівае базавыя веды па інфарматыцы, праграмаванні і матэматыцы, другі — спецыялізацыя, ён дазваляе ўдзельнікам паглыбіцца ў адзін з кірункаў, напрыклад Java, .NET, Automated Testing, Manual Testing, Cloud & DevOps, Front-End ці Business Analysis. Навучанне праводзіцца на ўкраінскай мове, а спецыялізацыя прадугледжвае інтэрактыўны кантэнт на англійскай.

«Праграма накіравана не толькі на прафесійнае развіццё і працаўладкаванне, але і на адаптацыю ветэранаў праз навучанне. Заняткі будуць праходзіць у невялікіх групах пры падтрымцы выкладчыкаў і ментараў у бяспечным асяроддзі», — адзначаюць арганізатары.

Кампанія праводзіла праграму ўжо некалькі разоў. Выпускнікі першых набораў праграмы ўжо ўладкаваліся ў EPAM як малодшыя спецыялісты.