EPAM скараціў глабальны штат і рэзка паменшыў выдаткі на рэлакейт

Выручка і прыбытак

За студзень-сакавік EPAM атрымаў выручку ў памеры 1,2 мільярда долараў. У параўнанні з аналагічным перыядам мінулага года выручка павялічылася амаль на 40 мільёнаў долараў, або на 3,4%. Квартальная выручка адпавядае прагнозу, які кампанія зрабіла яшчэ ў лютым.

Па выніках другога квартала EPAM прагназуе атрымаць выручку ў памеры 1,19-1,20 мільярда долараў.

Сумарны чысты прыбытак кампаніі за першы квартал перавысіў 100 мільёнаў долараў — на 14% больш, ніж за першы квартал 2022 года. Адная з прычын росту прыбытку — рэзкае зніжэнне страт ад курсавых розніц. Калі па выніках студзеня-сакавіка мінулага года страта склала амаль 23 мільёны долараў, то па выніках студзеня-сакавіка гэтага года толькі 4,6 мільёна долараў.

Выдаткі на рэлакацыю

Ад першага квартала мінулага года — пасля пачатку вайны ва Украіне — EPAM пачаў адлюстроўваць у справаздачнасці выдаткі на рэлакейт сваіх супрацоўнікаў. У асноўным гэта былі затраты на пераезд спецыялістаў з Беларусі, Украіны і Расіі.

Усяго за мінулы год на рэлакацыю кампанія выдаткавала 39 мільёнаў долараў, з іх амаль палову (18, 7 мільёна долараў) — за першы квартал.

Судзячы з усяго, EPAM ужо перавёз асноўную частку спецыялістаў і сёлета рэлакуюцца толькі асобныя супрацоўнікі, пра што ўскосна сведчыць сума выдаткаў на рэлакейт. За студзень-сакавік яна склала ўсяго 212 тысяч долараў. Гэта мінімум за мінулы і гэты год.

Скарачаць выдаткі на рэлакацыю кампанія пачала ўжо ў другой палове мінулага года. Калі за першае паўгоддзе выдаткі склалі каля 33 мільёнаў долараў, то за другое паўгоддзе ўсяго каля 6 мільёнаў долараў.

Дапамога Украіне

Каб дапамагчы ўкраінскім супрацоўнікам і іх сем’ям, EPAM летась таксама запусціў праграму гуманітарнай дапамогі на 100 мільёнаў долараў. За мінулы год на гэтыя мэты кампанія выдаткавала амаль палову сумы — каля 45 мільёнаў долараў.

За першы квартал гэтага года ў рамках праграмы EPAM выдаткаваў крыху больш за 6 мільёнаў долараў. Для параўнання ў студзені-сакавіку мінулага года выдаткі перавысілі 25 мільёнаў долараў.

Штат EPAM

Глабальны штат EPAM за першы квартал скараціўся амаль на 2 тысячы чалавек. Калі на канец снежня 2022 года ў кампаніі працавала 59,3 тысячы супрацоўнікаў, то на канец першага квартала гэтага года — 57,4 тысячы.

Штат вытворчых спецыялістаў EPAM за квартал паменшыўся ад 52,9 тысячы да 51,1 тысячы.

Кампанія не публікуе ў квартальных справаздачах інфармацыю пра колькасць супрацоўнікаў у асноўных лакацыях. Нагадаем, за мінулы год штат вытворчых спецыялістаў беларускага офіса EPAM скараціўся ў два разы да 4,5 тысяч чалавек.

dev.by, як і іншым сумленным медыя, сёння вельмі складана: рэдакцыя працуе па-за межамі краіны, а нашыя рэкламныя даходы скараціліся ў некалькі разоў.

Але мы даем рады — з вашай дапамогай. Гэта вы дзеліцеся з намі інфанагодамі, думкамі, досведам, часам і ўвагай. А 170 чытачоў падтрымліваюць нас данатамі. У 2023 годзе мы хочам сабраць 1000 чытачоў-падпісчыкаў. 

Дапамагчы нам можна праз Patreon. 

З Беларусі — праз Donorbox.

І яшчэ крыптой, тут гаманцы.

Дзякуй, што прачыталі гэтае паведамленне.