EPAM адкрывае офіс у Азербайджане

У бліжэйшы час у сталічным Баку адкрыецца прадстаўніцтва кампаніі. Яно будзе выконваць не толькі аперацыйныя функцыі, але і стане інавацыйным цэнтрам для рэалізацыі маштабных лічбавых ініцыятыў.

EPAM плануе ўкараняць у Азербайджане перадавыя рашэнні, паспяхова рэалізаваныя ў іншых краінах. Кампанія мае намер актыўна ўдзельнічаць у лічбавізацыі дзяржаўных паслуг, пашырэнні платформы mygov (гэта мясцовая экасістэма лічбавых сэрвісаў, якая забяспечвае доступ да дзяржпаслуг і сувязі з уладамі), а таксама ўкараненні інструментаў для павышэння эфектыўнасці і даступнасці гэтых паслуг.

Праз платформу EPAM Campus будзе ажыццяўляцца падрыхтоўка мясцовых ІТ-спецыялістаў, развіццё тэхналагічных кампетэнцый і рэалізацыя сумесных праектаў з Агенцтвам па інавацыях і лічбавым развіцці і іншымі дзяржструктурамі. Асаблівае месца зойме інтэграцыя ШІ-рашэнняў для аўтаматызацыі працэсаў, павышэння дакладнасці і хуткасці надання паслуг, а таксама паляпшэння карыстальніцкага досведу.

У Агенцтве адзначылі, што партнёрства з EPAM Systems зробіць значны ўнёсак у развіццё лічбавага кіравання, ШІ, чалавечага капіталу і ўмацуе ролю Азербайджана ў сферы ІКТ-паслуг і экспарту тэхналогій. У EPAM Systems заявілі, што Азербайджан прыцягвае ўвагу як краіна, якая робіць смелыя крокі і дынамічна развіваецца ў сферы лічбавізацыі. У кампаніі радыя «аб’яднаць мясцовыя таленты з перадавым сусветным досведам і зрабіць свой унёсак у лічбавую трансфармацыю краіны».