EPAM працягне працу ў Беларусі. Справаздача для камісіі па каштоўных паперах ЗША

У справаздачы расказваецца, колькі ў кампаніі грашовых сродкаў на рахунках у банках Беларусі, Расіі і Украіны.

Станам на 30 чэрвеня 2022 года на рахунках у беларускіх банках у EPAM было 40,4 мільёна долараў у эквіваленце, ва ўкраінскіх банках — 40,2 мільёна долараў у эквіваленце, у расійскіх банках — 17,2 мільёна долараў у эквіваленце.

Увосень мінулага года кампанія трымала ў беларускіх банках больш як 65 мільёнаў долараў, на канец сакавіка гэтага года — 51 мільён долараў. Акрамя таго, у кампаніі было дадаткова 28,9 мільёна долараў у банку, доступ да якіх быў недаступны праз адміністрацыйную праверку з боку банка. Гэтыя сродкі кампанія атрымала на працягу красавіка і амаль усе перавяла ў іншы банк у Беларусі.

Сума сродкаў на рахунках у расійскіх банках скарачаецца значна хутчэй. Калі на канец сакавіка кампанія трымала там амаль 60 мільёнаў долараў у эквіваленце, то на канец чэрвеня — у тры разы менш.

У той жа час ва ўкраінскіх банках кампанія павялічыла за квартал сродкі на рахунках у 1,5 разу — з 28 да 40 мільёнаў долараў.

EPAM удакладняе, што грашовыя сродкі ў рэгіёне выкарыстоўваюцца для аперацыйных патрэб. Рэшткі сродкаў у банках змяняюцца ў залежнасці ад аперацыйных патрэб у рэгіёне.

Таксама EPAM апублікаваў інфармацыю пра доўгатэрміновыя актывы ў розных краінах.

На канец чэрвеня яны ацэньваліся ў 211,1 мільёна долараў. За паўгода кошт актываў знізіўся на 25 мільёнаў долараў, або на 12%.

Доўгатэрміновыя актывы EPAM у Беларусі ацэньваліся на канец чэрвеня ў 64,4 мільёна долараў. За паўгода іх кошт знізілася на 11 мільёнаў долараў, або на 15%.

У справаздачы таксама адзначаецца, што EPAM разлічвае заставацца ў Беларусі: «Мы разлічваем працягнуць працаваць у Беларусі і рэалізоўваць нашы прадугледжаныя для краіны планы забеспячэння бесперапыннасці бізнэсу».