ЕС і ЗША ўзмоцняць супрацоўніцтва па рэгуляванні АІ

Паводле даных TechCrunch, падрабязнасці супрацоўніцтва абвесцяць на пасяджэнні Рады па гандлі і тэхналогіях ЕС-ЗША (TTC) у пятніцу, 5 красавіка. TTC быў створаны падчас прэзідэнцтва Дональда Трампа, каб забяспечыць супрацоўніцтва заканадаўцаў у пытаннях гандлёвай і тэхналагічнай палітыкі.

Гэта будзе шостае пасяджэнне Рады ад моманту пачатку працы форуму ў 2021 годзе. Эксперты мяркуюць, што перспектыва другога прэзідэнцкага тэрміну Трампа вымусіць сяброў Рады максымізаваць магчымасці для сумеснай працы ўжо цяпер. У першую чаргу заканадаўцы абмяркуюць закон аб АІ, які набывае моц, бо быў нядаўна прыняты Еўрапарламентам.

Крыніцы выдання заявілі, што супрацоўніцтва засяродзіцца на дзвюх тэмах — гэта бяспека АІ-мадэляў і стандартызацыя галіны. Таксама Рада зверне ўвагу на сумесную даследчую дзейнасць, якая дазволіць укараняць тэхналогіі АІ у краінах, якія развіваюцца, і дзяржавах Глабальнага Поўдня ў ахове здароўя, сельскай гаспадарцы, энергетыцы.

У сакавіку ЗША і Вялікабрытанія падпісалі пагадненне аб партнёрстве ў галіне бяспекі штучнага інтэлекту. Супрацоўніцтва паміж ЗША і ЕС будзе насіць, відаць, больш агульны характар, у тым ліку працу па электроннай ідэнтыфікацыі грамадзян і антыманапольнай дзейнасці.

Летась урад Вялікабрытаніі заявіў, што вядучыя распрацоўшчыкі АІ Anthropic, DeepMind і OpenAI абавязаліся даваць брытанскім рэгулятарам «ранні або прыярытэтны доступ» да іх АІ-мадэляў для падтрымкі даследаванняў у галіне ацэнкі і бяспекі такіх сістэм.

На брытанскім саміце па АІ у лістападзе мінулага года міністарка гандлю ЗША Джына Раймонда абвясціла аб стварэнні інстытута бяспекі АІ, які будзе падсправаздачны міністэрству і стане падраздзяленнем Нацыянальнага інстытута стандартаў і тэхналогій. Новая арганізацыя будзе супрацоўнічаць з іншымі групамі па бяспецы АІ, створанымі ўрадамі партнёраў ЗША.