Алеся Чапкевич bel 10 сакавіка 2026, 15:46

Яшчэ адзін плацежны сервіс пачаў блакаваць беларусаў

Электронная плацежная сістэма Skrill пачала блакаваць акаўнты беларусаў. Пра гэта паведамілі чытачы Office Life.

Карыстальнікі з Беларусі атрымліваюць паведамленні пра тое, што «санкцыйныя абмежаванні ўплываюць на магчымасць прадастаўляць паслугі» ў краіне. Паведамленні пра закрыццё акаўнтаў прыходзяць у той жа дзень, калі да іх ужо нельга атрымаць доступ — і вывесці грошы.

«Гэта рашэнне звязана з нашымі нарматыўнымі і санкцыйнымі абмежаваннямі. Яно не звязана з вашай асабістай дзейнасцю», — адзначана ў такіх паведамленнях.

Office Life адзначае, што з пачатку сакавіка падобныя паведамленні атрымліваюць расійскія карыстальнікі. У тэматычных чатах пішуць, што блакуюць усе акаўнты, якія былі зарэгістраваны на пашпарт Беларусі ці Расіі, калі гэтыя дзяржавы пазначаны і як краіна пражывання. Вывесці грошы з заблакаванага акаўнта магчыма толькі пераводам на рахунак у банку, адкрыты на імя ўладальніка акаўнта. Але беларускія і расійскія банкі для такіх мэтаў не падыдуць — зноў-такі з-за санкцый.

Skrill — электронная плацежная сістэма, заснаваная ў Лондане. З 2022 года яна працавала для беларусаў з абмежаваннямі, напрыклад было нельга зарэгістраваць новы акаўнт.