«Гэта быў час гарэння ў пекле» — уладальнік «Лесты» пра падзел бізнесу з Wargaming

Калі вясной 2022-га Wargaming вырашыла сысці з Беларусі і Расіі, перадаўшы ўвесь рэгіянальны бізнес «Лесце», Хатажаеў слаба верыў, што яго кампанія будзе жыццяздольнай сама па сабе, але намагаўся хаваць свае сумневы і трымаць твар перад супрацоўнікамі.

«Любая кампанія — гэта жывы арганізм са сваімі ўнутранымі органамі, якія адказваюць за вузкія спецыяльнасці. Калі ўсё разразаецца бензапілой па жывым, гэта нікому не прыносіць радасці. Боль вялікі. Больш за тое, частка функцыяналу застаецца дзесьці там, у іншых адрэзаных частках, і гэта вельмі складана і вельмі балюча», — патлумачыў Хатажаеў.

Пасля падзелу бізнесу ў штаце «Лесты» засталася асноўная каманда World of Warships, а ў штаце Wargaming — асноўная каманда World of Tanks. Падчас пераходнага перыяду абедзве кампаніі дзяліліся адна з адной распрацоўкамі і імкнуліся нарошчваць свае кампетэнцыі, але пасля яго заканчэння супрацоўніцтва было юрыдычна забаронена.

Падзел бізнесу працягваўся крыху больш за год і быў цалкам завершаны ў жніўні 2023 года. З таго моманту «Леста» і Wargaming ніяк не звязаныя.

Хатажаеў нагадаў, што «Леста» добра зарабляла яшчэ да аддзялення ад Wargaming. Да вясны 2022-га выручка World of Warships ужо значна перавысіла мільярд даляраў.

«Леста» не плаціць сваёй былой мацярынскай кампаніі ніякіх адлічэнняў за гульні «Мир Кораблей», «Мир Танков» і Tanks Blitz — пад гэтымі назвамі World of Warships, World of Tanks і World of Tanks Blitz працуюць у Расіі і Беларусі з восені 2022-га. Заробленыя грошы «Леста» ўкладае ў бягучыя і новыя праекты, у тэхналогіі і інфраструктуру.

Акрамя таго, «Леста» паступова адмаўляецца ад арэнды офісных памяшканняў на карысць іх набыцця. Як лічыць бізнесмен, гэта дапаможа ёй «пусціць карані» ў лакацыях. На дадзены момант у кампаніі два ключавыя офісы: у Мінску і Санкт-Пецярбургу. У кожным з іх працуе каля тысячы супрацоўнікаў, яшчэ каля 200 чалавек працуюць у Маскве.

Гаворачы пра працу, прадпрымальнік адзначыў, што ў «Лесце» няма ні аддаленай працы, ні гібрыднага рэжыму. Усе яе супрацоўнікі працуюць з офіса. Паводле яго меркавання, такі фармат працы станоўча ўплывае на распрацоўку гульняў.

Актыўная аўдыторыя гульняў кампаніі цяпер у сярэднім складае 6,5 млн чалавек, з якіх 600 тысяч гульцоў — жыхары Беларусі. У асноўным у праекты «Лесты» гуляюць мужчыны. Напрыклад, у «Мире Кораблей» іх 95% ад усіх карыстальнікаў. Што тычыцца ўзросту, гульцам Tanks Blitz звычайна ад 25 да 40 гадоў, а гульцам «Мира Кораблей» — ад 35 да 55 гадоў.

Месяц таму Хатажаеў распавёў, што 2024 год стаў рэкордным для «Лесты» па выручцы — яна склала 35 млрд RUB ($412 млн) пры чыстым прыбытку ў 16 млрд RUB ($188 млн).