«Гэта поўны гармідар»: сустрэча прэзідэнта Blizzard з працаўнікамі скончылася шквалам крытыкі

Паводле слоў супрацоўнікаў, прэзідэнт студыі Майк Ібара правёў сустрэчу з працаўнікамі, адказаўшы на папярэдне адабраныя пытанні. Паводле даных Game Developer, заявы кіраўніка знервавалі і раззлавалі супрацоўнікаў. Яны расказалі пра сход ананімна. Прадстаўнік Blizzard пацвердзіў, што ўсе каментары адпавядаюць рэчаіснасці.

Ібара выступіў у абарону сістэмы ацэньвання супрацоўнікаў, якую раскрытыкаваў адзін з кіраўнікоў распрацоўкі World Of Warcraft Браян Бірмінгем перад тым, як пакінуць кампанію. Бірмінгем лічыць, што сістэма змушае ставіць нізкую адзнаку частцы супрацоўнікаў, нават калі яны заслугоўваюць вышэйшай адзнакі.

Таксама працаўнікі студыі атрымаюць толькі частку ад свайго бонуса ад прыбытку кампаніі за мінулы год. Гэтае рашэнне «аднолькава паўплывае і на кіраўніцтва». Ва ўнутраным чаце студыі ў Slack пачалася хваля абурэнняў. Сход ішоў у Zoom, і чат быў адключаны. Адказваць на заявы Ібары можна было толькі эмодзі.

Прэзідэнт Blizzard намякнуў, што калі супрацоўнікам не падабаецца скасаванне аддаленай працы, яны маюць права знайсці іншае месца працы. Ібара спрабаваў апраўдаць нізкія заробкі ў аддзеле QA і аддзеле падтрымкі. Гэта прывяло да таго, што працаўнікі пачалі выказваць сваю незадаволенасць публічна.

«Пасля сённяшняга дня мая ўпэўненасць у кіраўніцтве распаўсюджваецца толькі на чацвёртую каманду [Overwatch] і не далей за яе. Гэты тыдзень быў поўным гармідарам. Мы проста хочам ствараць крутыя гульні, якая розніца адкуль мы гэта робім?» —  сказаў Браян Бэдфард, мастак персанажаў.