Еўрапейскія стартапы пераманьваюць IT-спецыялістаў, пакуль у ЗША хаос з візамі H-1B

Раней прэзідэнт ЗША нечакана ўвёў збор у памеры $100 000 даляраў у год за кожную візу H-1B — ключавы інструмент прыцягнення кваліфікаваных спецыялістаў у краіну. Амерыканскія гіганты Amazon, Google і Microsoft у тэрміновым парадку вярнулі супрацоўнікаў з H-1B з замежных паездак і рэкамендавалі ім адмовіцца ад планаваных камандыровак.

Тым часам у Еўропе кампаніі разгарнулі актыўную кампанію па пераманьванні спецыялістаў, якія апынуліся ў падвешаным стане. Заснавальнік брытанскага фінтэх-еднарога Cleo Барні Хасі-Йео напісаў на LinkedIn: «Новы збор у $100 000 пакінуў неверагодную колькасць талентаў у няпэўнасці. Калі гэта пра вас, мы гатовыя дапамагчы». Кампанія адкрыла больш за сотню вакансій у сваім лонданскім офісе.

Падобныя заявы зрабілі і іншыя еўрапейскія стартапы. Генеральны дырэктар ШІ-відэаплатформы Synthesia Віктар Рыпарбэлі адзначыў: «H-1B стварае вялікую няпэўнасць, але каб атрымаць працу ўзроўню Сіліконавай даліны, віза вам не патрэбна». У Шатландыі кіраўнік Wordsmith Рос Макнэйрн паабяцаў спансаваць візы для інжынераў, якія вырашылі пераехаць у Вялікабрытанію.

Актыўнасць праяўляюць не толькі стартапы. Паводле СМІ, нават брытанскі ўрад бачыць у сітуацыі шанец узмацніць кампанію за адмену збораў на візы для топ-спецыялістаў.

Вашынгтон спрабуе змякчыць наступствы рашэння. Чыноўнікі заяўляюць, што новы збор не закране дзеючых уладальнікаў віз або тых, хто падаўжае H-1B, а таксама абяцаюць выключэнні для асобных галін, уключаючы медыцыну. Аднак кампаніі не спяшаюцца давяраць абяцанням.

Эксперты лічаць, што найбольш моцна пацерпяць амерыканскія стартапы. Кіраўнік Y Combinator Гары Тан назваў новаўвядзенне «велізарным падарункам для замежных тэххабаў» і адзначыў, што «раннія каманды не змогуць праглынуць такі падатак» ва ўмовах сусветнай гонкі ў галіне ШІ.