Фаўндар Reddit хоча, каб яго 7-гадовая дачка карысталася ШІ кожны дзень. Айцішныя СЕО з ім не згодныя

«Я шчыра захоплены тым, што ў яе ў руках будзе звышінтэлект», — падзяліўся Аганян. Ён распавёў, што выкарыстоўвае ШІ для развіцця творчасці дачкі — напрыклад, яны з дапамогай ChatGPT «ажывілі» яго дзіцячыя малюнкі алоўкам. «Вам не перадаць яе рэакцыю», — падкрэсліў Аганян. У яго ёсць другая дачка, якой адзін год.

Ён кажа, што Алексіс Алімпія малюе ўручную — фламастарамі на паперы, але з дапамогай ШІ гэтыя малюнкі можна ператварыць у нешта большае. «Я хачу, каб яна разумела: гэта — суперздольнасць, якой ёй варта авалодаць», — сказаў ён.

Таксама бізнесмен выступае за тое, каб бацькі давалі сваім дзецям навучальныя ШІ-інструменты для выканання дамашніх заданняў. Яго дачцэ яны «вельмі зайшлі». Ён падкрэслівае, што базавыя веды ўсё яшчэ важныя: чытаць, пісаць і лічыць яго дачка павінна ўмець. Але пры гэтым ён хоча, каб яна зразумела: «сыры інтэлект» — такія задачы, як пошук інфармацыі, вырашэнне праблем, аналіз — цяпер даступныя праз ШІ. Яна не абавязана быць геніем у кожным прадмеце — замест гэтага ён лічыць важнымі ўменне карыстацца тэхналогіямі, самастойнасць, настойлівасць і крэатыўнасць.

Пазіцыю Аганяна падзяляюць не ўсе ўдзельнікі сферы ШІ. Напрыклад, СЕО OpenAI Сэм Альтман выступае супраць таго, каб у яго сына ўзнікала моцная эмацыйная сувязь з ШІ. Таксама ён лічыць, што распрацоўшчыкі ШІ-інструментаў павінны яшчэ больш уважліва прадумваць абарону дзяцей, якія імі карыстаюцца, чым дарослых. Былы СЕО Google Эрык Шмідт упэўнены, што ШІ можа паўплываць на фармаванне асобы і культуры дзіцяці, і таксама выступае за строгія правілы бяспекі ў гэтай сферы. СЕО Meta Марк Цукерберг, у якога тры дачкі, таксама не хоча, каб яны «доўга сядзелі перад тэлевізарам або камп’ютарам».