ФБР даведалася, што ў гаджатах Томаса Мэцью Крукса, які страляў у Трампа

Паводле звестак The New York Times, супрацоўнікі ФБР вывучылі два тэлефоны і ноўтбук Крукса. Прадстаўнікі ведамства заявілі, што дагэтуль не выяўлена ніякіх прыкмет таго, што Крукс прытрымліваўся нейкіх ярка выяўленых палітычных поглядаў. Таксама не было знойдзена доказаў, што ў яго былі нейкія саўдзельнікі або сувязі з замежнікамі.

У прыладах Крукс шукаў даты выступаў Трампа і з’езда Дэмакратычнай партыі, фатаграфіі Трампа і Байдэна, дырэктара ФБР Крыстафера Рэя, генпракурора Мэрыка Гарланда і сяброў брытанскай каралеўскай сям'і. У гісторыі яго браўзераў знайшлі запыты пра дэпрэсію: Крукс шукаў інфармацыю пра «цяжкі дэпрэсіўны разлад».

Таксама на платформе Steam следчыя знайшлі паведамленне, якое меркавана напісаў Крукс. Карыстальнік заявіў, што плануе правесці «прэм’еру» 13 ліпеня — у дзень, калі быў здзейснены замах на Трампа. За гадзіну да мітынгу ў Пенсільваніі спецслужбы адзначылі маладога чалавека як падазронага, але потым страцілі яго з-пад увагі. Таксама вядома, што Крукс прынамсі адзін раз за некалькі дзён да мітынгу наведваў тое месца — кірмашовую плошчу акругі Батлер.