Геймеры падалі ў суд на Activision Blizzard за манаполію на лігі і турніры Call of Duty

Пазоў падалі прафесійныя геймеры Гектар Радрыгес (псеўданім H3CZ) і Сэт Абнер (Scump) у Федэральны суд Лос-Анджэлеса. У пазове паказана, што Activision Blizzard заклала аснову манаполіі Call of Duty, купіўшы за $46 мільёнаў «вядучага арганізатара спаборніцтваў» па гульнях серыі — кампанію Major League Gaming.

Пазоўнікі лічаць, што ў 2019 годзе кампанія ператварыла супольнасць з «квітнеючага канкурэнтнага рынку» ў сваю манаполію, прыбраўшы канкурэнтаў і наклаўшы на каманды і геймераў «драконаўскія» ўмовы кантрактаў. «Каманды, якія не захацелі або не змаглі выканаць рабаўніцкія патрабаванні Activision, былі выключаныя з прафесійнага рынку Call of Duty», — гаворыцца ў пазове.

Гульцы патрабуюць ад студыі пакрыць не менш за $680 мільёнаў сукупнай шкоды, якую панеслі заяўнікі ў выніку супрацьпраўных дзеянняў кампаніі. Студыя заявіла, што прэтэнзіі не маюць «ані фактычнай, ані юрыдычнай падставы» і адхіліла дасудовае патрабаванне пазоўнікаў выплаціць кампенсацыю за адмову ад падачы пазову.