Гендырэктар OpenAI сказаў, чым зоймецца, калі яго заменіць ШІ

«Аднойчы настане час, калі ШІ стане кіраваць OpenAI значна лепш за мяне, і я дакладна буду не ў захапленні, калі гэта здарыцца», — адзначыў ён у інтэрв’ю з СЕО Axel Springer Матыясам Дзёпфнерам на мінулым тыдні.

«У мяне ёсць ферма, на якой я жыву частку часу, і яна мне вельмі падабаецца», — падзяліўся Альтман. Акрамя гэтага, у яго ёсць шматмільённыя дамы ў Сан-Францыска і Напе ў Каліфорніі, а таксама маёнтак за $43 млн на Гаваях, адзначае Business Insider.

Бізнесмен кажа, што да рэлізу ChatGPT праводзіў на ферме больш часу — катаўся на трактарах і збіраў дары зямлі.

Раней Альтман заяўляў, што дзень, калі ШІ будзе разумнейшы за людзей, набліжаецца, і вельмі хутка, а ў некаторых галінах ужо настаў. «У кароткатэрміновай перспектыве ШІ знішчыць вельмі шмат рабочых месцаў, а ў доўгатэрміновай — як і ў любую іншую тэхналагічную рэвалюцыю — мы знойдзем сабе зусім новыя заняткі», — адзначаў прадпрымальнік. На яго думку, гэтая праца будзе звязана з дапамогай іншым: перавага людзей не ў «інтэлектуальных здольнасцях», а ў тым, што яны клапоцяцца адзін аб адным.