«Вітаю, GitHub»: GitHub запусціў тэставанне галасавога памочніка для Copilot

Дастаткова будзе сказаць «Hey, Github», або «Вітаю, GitHub» для пачатку работы. «Раз Copilot — наш напарнік-праграміст, мы павінныя ўмець з ім размаўляць. Менавіта над гэтым і працуе нашая каманда. Мы вельмі спадзяемся, што гэта дазволіць ацаніць карысць Copilot яшчэ большай колькасці распрацоўшчыкаў — у тым ліку тым, каму цяжка або хто не можа друкаваць», — заявілі ў кампаніі.

Над сістэмай галасавога кіравання працуе каманда інжынераў-распрацоўшчыкаў і даследчыкаў GitHub Next. Паводле іх слоў, цяпер можна папрасіць праграму напісаць і адрэдагаваць фрагмент кода, перамясціцца да неабходнага метаду, запусціць праграму і патлумачыць, што робіць канкрэтны радок.

На сайце можна паглядзець, як працуе тэставая версія, таксама ёсць запіс на «тэхнічны агляд» — распрацоўшчыкі збіраюць зваротную сувязь для паляпшэння прадукту. Пакуль кіраванне голасам будзе працаваць толькі ў рэдактары Visual Studio Code.