Кіраўнік Nvidia Джэнсэн Хуанг нечакана расхваліў Ілана Маска ў інтэрв’ю CNBC. Каментуючы інфармацыю пра тое, што Nvidia будзе ўдзельнічаць у новым інвестраўндзе xAI, ён сказаў, што шкадуе, што раней не ўклаў у стартап больш.
Кіраўнік Nvidia Джэнсэн Хуанг нечакана расхваліў Ілана Маска ў інтэрв’ю CNBC. Каментуючы інфармацыю пра тое, што Nvidia будзе ўдзельнічаць у новым інвестраўндзе xAI, ён сказаў, што шкадуе, што раней не ўклаў у стартап больш.
«Раней мы ўжо інвеставалі ў xAI, і адзінае, пра што я шкадую, — што я не даў [Маску] больш грошай», — сказаў Хуанг. Ён дадаў, што вельмі рады новай магчымасці і што ў Маска ёсць дар будаваць прарыўныя кампаніі: «Амаль ва ўсё, чым займаецца Ілан, сапраўды варта ўпісацца».
Па словах Хуанга, xAI ўваходзіць у новае пакаленне кампаній разам з OpenAI і Anthropic, якія трансфармуюць сферу вылічэнняў па меры таго, як мадэлі разумнеюць і пачынаюць прыносіць рэальную аддачу. «Некалькі гадоў гэтыя кампаніі генеравалі токены сабе ў страту. Але за апошнія месяцы стала відавочна, што [ШІ] ужо ўмее разважаць, рабіць даследаванні, карыстацца інструментамі — і гэта насамрэч прыносіць карысць. Цяпер токены прыносяць прыбытак», — адзначыў гендырэктар.
Хуанг падкрэсліў, што цяперашняя хваля інвестыцый у ШІ кардынальна адрозніваецца ад дотком-эры. Тады агульны маштаб інтэрнэт-кампаній складаў «$30-40 млрд», а цяпер толькі рынак гіпермаштабных правайдэраў («hyperscalers») ацэньваецца прыкладна ў $2,5 трлн. Ён назваў тое, што адбываецца, «шматтрыльённай перабудовай» — пераходам ад класічных CPU да генератыўнага ШІ на GPU, у якім Nvidia адыгрывае ключавую ролю.
Хуанг таксама падзяліўся, што яго любімы карпаратыўны ШІ-сэрвіс — інструмент для праграмавання Cursor. «Кожны наш інжынер, усе сто працэнтаў, зараз працуе з ШІ-кодэрамі. І наша прадукцыйнасць вырасла неверагодна», — дадаў ён.
Таксама ён сказаў, што быў вельмі здзіўлены ўгодай паміж OpenAI і AMD, але назваў яе разумным ходам. Nvidia з’яўляецца канкурэнтам AMD, якую ўзначальвае стрыечная пляменніца Хуанга Ліза Су, а таксама ключавым партнёрам OpenAI, ля вытокаў якой стаяў Маск — а цяпер закідвае яе судовымі пазовамі.
Рэлацыраваліся? Цяпер вы можаце каментаваць без верыфікацыі акаўнта.