Глава ПВТ распавяла, як замяняюць ІТ-спецыялістаў, якія з'ехалі, і Booking

Паводле яе слоў, у ПВТ «пакуль яшчэ асцярожна сочаць за гэтымі трэндамі». Але стратэгічна там заўсёды імкнуліся не толькі развіць кампетэнцыі на аснове таго, што кампаніі рабілі на аўтсорсінгу, і дабівацца фінансавых паказчыкаў, але і «сфарміраваць пул людзей, якія захочуць рабіць нешта сваё».

«Таму зараз тыя кампаніі, якія да нас прыходзяць за апошні год-паўтара, гэта ў асноўным беларускія кампаніі, маладыя, якія маюць амбіцыі, якія пакуль яшчэ, можа, нават не вызначыліся, на якіх рынках яны будуць працаваць, але ў іх ёсць ідэя, ёсць нейкі цікавы прадукт», — адзначыла начальніца ПВТ.

Такім кампаніям абяцаюць даць умовы для развіцця ўнутры краіны. Плюс ПВТ «заўсёды спрыяе таму, каб геаграфія пашыралася максімальна».

«Тыя распрацоўкі, якія тычацца замены, напрыклад, умоўнага Booking, такі беларускі прадукт, які будзе замяняць гэтую пошукавую сістэму. Не сакрэт, што ў нас вельмі актыўна зараз развіваецца турызм, асабліва з Расіі, з іншых, дзякуючы адкрытаму бязвізу, краін. І, вядома, усім хочацца таксама мець такі інструмент, які будзе задзейнічаны. У медыцыне вельмі шмат цікавых рашэнняў па распазнаванні інтэлектуальным, здымкаў рэнтгенаўскіх, іншых здымкаў. З’яўляюцца цікавыя фінансавыя рашэнні, з’яўляюцца цікавыя рашэнні з дапоўненай рэальнасцю, з’яўляюцца рашэнні па рабатызаваных комплексах. Гэта значыць узровень амбіцыі, ён такі, ведаеце, не дробнатраўчаты, а даволі сур’ёзны сабе», — расказала Рабава.

І дадала, што, магчыма, ужо проста зараз «у нашых майстэрнях падрастаюць тыя самыя людзі, пра якіх потым гавораць шмат у свеце».

Паводле яе слоў, зараз у ПВТ 1026 рэзідэнтаў, і на гэтым узроўні лічба захоўваецца вельмі даўно. «Яны змяняюцца часам па напрамках тэхналагічных, арыентацыях геаграфічных. Але ў прынцыпе карціна малюецца ўвесь час жывая, але трэндавая, скажам, усталяваная. Яна рухаецца па нейкіх месцах, але не змяняецца істотна», — апісала сітуацыю Рабава.

У ПВТ уважліва глядзяць, «якія кампаніі могуць стаць той кропкай росту, якая, можа быць, увогуле там драйверне нейкі асобны новы напрамак».