Аддзел навін world 5 мая 2025, 13:15

Google рыхтуе маштабны рэдызайн Android

Google збіраецца істотна абнавіць знешні выгляд сваёй мабільнай аперацыйнай сістэмы. Журналісты Android Authority падзяліліся скрыншотамі зменаў, заўважаных у Android 16 Beta 4.

1 каментарый

Google збіраецца істотна абнавіць знешні выгляд сваёй мабільнай аперацыйнай сістэмы. Журналісты Android Authority падзяліліся скрыншотамі зменаў, заўважаных у Android 16 Beta 4.

Адна з навінак датычыцца значкоў у статус-бары: індыкатары Wi-Fi і сотавай сеткі стануць сегментаванымі, а іконка акумулятара будзе падсвятляцца зялёным падчас зарадкі. Фон панэлі хуткіх налад і апавяшчэнняў стане напаўпразрыстым, можна будзе наладжваць памер цэтлікаў, з’явіцца асобная плітка для Wi-Fi.

Таксама будзе размыццё фону на сістэмных экранах, уключаючы меню нядаўніх аплікацый, спіс усіх праграм у Pixel Launcher і экране ўводу пін-кода. Індыкатары даты і надвор’я на экране блакіроўкі перамесцяцца пад гадзіннік, а ўваходныя апавяшчэнні будуць адлюстроўвацца ў маленькай кнопцы, каб не перакрываць шпалеры.

Тумблеры рэгулявання гучнасці і яркасці стануць танчэйшымі і з менш выяўленымі закругленнямі. Іконкі на галоўным экране налад стануць каляровымі, а параметры ў падменю будуць згрупаваныя ў кантрастныя падкладкі. Таксама вернецца налада формы значкоў у Pixel Launcher.

У каруселі ніжэй — параўнанне цяперашняй (злева) і новай (справа) версіі UI.

Калі дакладна чакаць новы інтэрфейс, пакуль невядома. У Android Authority мяркуюць, што Google не будзе запускаць яго разам з фінальным рэлізам Android 16 і прытрымае да адной з наступных версій сістэмы. Тым не менш, праз тыдзень пройдзе The Android Show, а новаму пакаленню дызайн-парадыгмы Android — Material 3 Expressive — будзе прысвечана ўвага на будучай канферэнцыі Google I/O. Кампанія можа распавесці падрабязнасці падчас гэтых мерапрыемстваў.