Google і Apple адключаюць функцыі карт у Ізраілі і Газе праз пагрозу ўварвання

Паводле даных Bloomberg, Google адключыў інфармацыю аб дарожнай абстаноўцы ў рэгіёне для сваіх праграм Maps і Waze. «Як мы рабілі гэта раней у канфліктных сітуацыях і ў адказ на сітуацыю, якая развіваецца ў рэгіёне, мы часова адключылі магчымасць бачыць сітуацыю на дарогах у рэальным часе і інфармацыю аб занятасці з меркаванняў бяспекі мясцовых супольнасцяў», — заявілі ў кампаніі.

Для карыстальнікаў, якія знаходзяцца ў пацярпелых раёнах Ізраіля і сектара Газа, на экране Waze з’явілася апавяшчэнне з тэкстам: «У сувязі з сітуацыяй у галіне бяспекі: іншыя кіроўцы, коркі і іншыя папярэджанні не будуць адлюстроўвацца». У іншых раёнах Ізраіля, напрыклад, у Тэль-Авіве, Waze, відаць, працягвае працаваць, у той час як даныя аб дарожнай абстаноўцы ў рэжыме рэальнага часу ў Google Maps адключаныя па ўсёй краіне.

Крыніцы агенцтва паведамілі, што ізраільскае войска накіравала адпаведную просьбу ў Google. Зварот стаў прычынай карэкціроўкі працы картаграфічных сэрвісаў. The Hill паведамляе, што аналагічнае рашэнне па просьбе ЦАХАЛ (Арміі абароны Ізраіля) прынялі ў Apple для сэрвісу Apple Maps.

Паводле звестак Reuters, Ізраіль таксама наўмысна парушае працу GPS у зонах баявых дзеянняў. Кіраўнік прэс-службы ЦАХАЛ, контр-адмірал Даніэль Хагары заявіў, што збоі ў працы GPS могуць паўплываць на функцыі праграм.

Ізраіль паведаміў аб падрыхтоўцы наземнай аперацыі ў сектары Газа. Яна стане адказам на напад ХАМАС на населеныя пункты ў паўднёвай частцы краіны 7 кастрычніка. ЦАХАЛ абвясціла аб намеры знішчыць групоўку.

Раней Google адключала функцыю адсочвання загружанасці дарог падчас уварвання расійскіх войскаў ва Украіну. Кампанія прыняла такое рашэнне праз тры дні пасля пачатку поўнамаштабных баёў, пасля кансультацыі з уладамі.