Аддзел навін 20 студзеня 2023, 14:16

Google звальняе 12 тысяч чалавек

Гендырэктар Google і Alphabet Сундар Пічаі ў лісце да супрацоўнікаў абвясціў пра планы скараціць каля 12 тысяч супрацоўнікаў. Як адзначае Bloomberg, гэта больш за 6% глабальнага штату Alphabet.

1 каментарый

Гендырэктар Google і Alphabet Сундар Пічаі ў лісце да супрацоўнікаў абвясціў пра планы скараціць каля 12 тысяч супрацоўнікаў. Як адзначае Bloomberg, гэта больш за 6% глабальнага штату Alphabet.

Пічаі глыбока шкадуе пра тое, што кампаніі прыйшлося пайсці на такі крок, і прыняў на сябе адказнасць за рашэнні, якія да гэтага прывялі.

«За апошнія два гады мы перажывалі перыяды рэзкага росту. Каб паспяваць за гэтым ростам і спрыяць яму, мы наймалі, зыходзячы з чаканняў іншай эканамічнай рэальнасці, ніж мы маем сёння», — напісаў кіраўнік тэхнагіганта.

Каб ажыццявіць тыя вялізныя магчымасці, якія прыхоўвае будучыня Google, трэба ўмець рабіць складаны выбар у адпаведнасці з прыярытэтамі кампаніі, працягнуў Пічаі. Рашэнні пра звальненні прымаліся ў выніку комплекснай пераацэнкі бізнэсу. Яны закрануць усю Alphabet — матчыну кампанію Google, супрацоўнікаў розных прадуктовых кірункаў на розных пасадах, узроўнях карпаратыўнай іерархіі і ў розных лакацыях.

«Складана прадказаць будучыню». Гендырэктар Google адказаў на пытанне пра скарачэнні

Пічаі дадаў, што ў жыцці кампаніі непазбежныя складаныя эканамічныя перыяды, і ў такія моманты неабходна пераглядаць выдаткі і факусаваць сілы супрацоўнікаў і фінансы на найбольш важных кірунках.

Google ужо апавясціла пра звальненне супрацоўнікаў, якія базуюцца ў ЗША, электроннай поштай. У астатніх краінах працэс можа быць даўжэйшым з юрыдычных прычын.

Амерыканскім супрацоўнікам паабяцалі выплачваць заробак на працягу 60 дзён. Таксама ім выдадуць выхадную дапамогу за 16 працоўных тыдняў плюс 2-тыднёвую суму за кожны год працы ў Google, бонусы і дні аплачвальнага адпачынку за 2022 год, што засталіся. Акрамя гэтага, на працягу 6 месяцаў ім будуць пакрываць медстрахоўку, паслугі па працаўладкаванні і аказваць падтрымку імігрантам.