Google выпусціла Gemma — адкрытую АІ-мадэль для распрацоўшчыкаў і даследчыкаў

Gemma распрацавалі супрацоўнікі каманды Google DeepMind. Пры стварэнні мадэлі былі выкарыстаныя тыя ж напрацоўкі і тэхналогіі, якія ўжываліся для стварэння мадэляў Gemini. Перавага Gemma палягае ў тым, што дзякуючы меншым памерам яе лёгка запусціць лакальна на ноўтбуку або смартфоне.

Цяпер мадэль выпушчаная ў варыянтах Gemma 2B і Gemma 7B. Яны будуць даступныя праз Kaggle, Hugging Face, Nemo ад Nvidia і Vertex AI ад Google. Сістэма падтрымлівае генерацыю з пашыраным пошукам (RAG), што дазваляе працаваць з дакументамі і атрымліваць доступ да мноства інструментаў і сістэм для забеспячэння сумяшчальнасці з інтэрнэтам рэчаў, мабільнымі прыладамі і воблакам.

Абодва варыянты мадэлі будуць даступныя па камерцыйнай ліцэнзіі незалежна ад памеру арганізацыі, колькасці карыстальнікаў і тыпу праекта. Google таксама выпусціла інструкцыі Responsible Generative AI Toolkit, якія дапамогуць распрацоўшчыкам і даследчыкам ствараць бяспечныя АІ-праграмы.