Вашае меркаванне не важнае для нас: Google прымушае супрацоўнікаў выкарыстоўваць ШІ

У чэрвені віцэ-прэзідэнт па інжынерыі Мэган Качолія разаслала інжынерам ліст з патрабаваннем выкарыстоўваць карпаратыўныя ШІ-інструменты для паляпшэння кода. Акрамя таго, кампанія пачала абнаўляць апісанні некаторых інжынерных роляў — у іх дадалося згадванне працы з ШІ. А ў ліпені на агульным сходзе гендырэктар Сундар Пічаі наўпрост заявіў: выкарыстанне ШІ абавязковае, калі Google хоча выйграць гонку.

Для замацавання гэтай стратэгіі кампанія запусціла ўнутраныя навучальныя праграмы і мерапрыемствы, каб стымуляваць інжынераў да эксперыментаў з новымі інструментамі. Менеджары просяць супрацоўнікаў паказваць, як менавіта яны ўжываюць ШІ, і хаця афіцыйна ў Google кажуць, што гэта не ўплывае на ацэнкі, працаўнікі рыхтуюцца, што навык зносін з ШІ будзе ўлічаны пры рэв’ю.

Каб зрабіць працэс больш сістэмным, Google абнавіла правілы для інжынераў. У дакументах, спасылкі на якія былі ў лісце Качоліі, рэгламентавалася праца з ШІ — напрыклад, можна выкарыстоўваць толькі ўнутраныя мадэлі для напісання кода і трэба атрымліваць дазвол на чужыя рашэнні для іншых задач. Таксама паказана, што згенераваны ШІ код лічыцца вынікам працы супрацоўніка і павінен адпавядаць карпаратыўным стандартам.

Кампанія падкрэслівае, што ўкладанні ў ШІ прыносяць прыкметны плён. Паводле слоў Пічаі, яшчэ ў пачатку 2025 года Google фіксавала прыкладна 10%-ны прырост прадукцыйнасці інжынераў, а больш за 30% кода ў кампаніі ствараецца з дапамогай ШІ. Падаграваюць тэму і кадравыя хады: у ліпені Google выдаткавала $2,4 млрд на прыцягненне ключавых супрацоўнікаў стартапа Windsurf, каб развіваць напрамак ШІ-агентаў для кодынгу.

Сярод інструментаў, якімі карыстаюцца інжынеры Google, — унутраная платформа з агентам для напісання кода Cider. Яна працуе на розных мадэлях, уключаючы «Gemini for Google». На апошніх мітынгах менеджмент анансаваў новыя сродкі.

Навязванне ШІ не абмяжоўваецца распрацоўкай. Супрацоўнікаў аддзелаў продажаў і юрыдычнага дэпартамента менеджары таксама прымушаюць укараняць ШІ ў працоўныя працэсы, напрыклад NotebookLM. Некаторых навучаюць ствараць Gems — персаналізаваныя версіі Gemini для вырашэння вузкіх задач. YouTube у чэрвені правёў для супрацоўнікаў цэлы тыдзень, прысвечаны вайб-кодынгу.

Самі супрацоўнікі ставяцца да змяненняў па-рознаму. Многія разумеюць, што без ШІ ў Google далёка не з’едзеш. Некаторыя жартуюць на ўнутраных форумах, што тэхналогія, якую даводзіцца хваліць дзеля зарплаты, не такая ужо эфектыўная. Але агульнае адчуванне адно: у кампаніі гэты курс лічаць непазбежным, і тыя, хто не хоча застацца за бортам, вымушаныя да яго прыстасоўвацца.