Алеся Чапкевич bel 23 кастрычніка 2025, 14:49

«Гарызонт» і новыя беларускія банкі трапілі пад санкцыі ЕС

Еўрапейскі саюз зацвердзіў 19-ы пакет санкцый супраць Расіі. У ім таксама фігуруе «Гарызонт» і шэраг банкаў Беларусі.

ААТ «Н Холдзінг» — кіруючая кампанія холдынга «Гарызонт» — трапіла ў санкцыйныя спісы за распрацоўку і вытворчасць тавараў двайнога прызначэння, а таксама за супрацоўніцтва з ваенна-прамысловым комплексам Беларусі. Разам з ім пад санкцыямі апынулася навукова-даследчае УП «Інстытут лічбавага тэлебачання Гарызонт», якое займаецца ў тым ліку вытворчасцю спецыяльнай электронікі, — за супрацоўніцтва з Міністэрствам абароны.

Што датычыцца банкаў, то раней у санкцыйныя спісы былі ўнесены Банк БелВЭБ і Белгазпрамбанк. Цяпер да іх далучыліся Альфа-Банк, Сбербанк і ВТБ Банк. Санкцыі супраць іх уступаюць у сілу з 2 снежня. Іх пакаралі за выкарыстанне сістэмы хуткіх плацяжоў расійскага Цэнтрабанка і мясцовай плацежнай сістэмы «Мір».

Альфа-Банк ужо адрэагаваў на навіны. Там напісалі, што іх юрысты ўжо разбіраюцца, і паабяцалі трымаць кліентаў у курсе. «На дадзены момант усе нашы карты працуюць у ранейшым рэжыме. Нашым кліентам — і фізічным, і юрыдычным асобам — даступныя ўсе фінансавыя аперацыі як у аддзяленнях, так і анлайн», — гаворыцца ў Telgeram-канале банка.

У пачатку кастрычніка Bloomberg паведамляў, што беларускія банкі могуць трапіць пад санкцыі з-за расійскага стэйблкоіна A7A5, які звязаны з тамтэйшымі падсанкцыйнымі арганізацыямі.