На мяжы з Польшчай — велізарная чарга з легкавікоў і аўтобусаў

На раніцу 28 кастрычніка ў чарзе перад польскім пунктам пропуску Тэрэспаль (Брэст) было 1305 легкавых аўтамабіляў і 88 аўтобусаў. 

Для параўнання: раніцай у пятніцу, 25 кастрычніка, там было 760 легкавікоў і 15 аўтобусаў.

— Ад пятніцы колькасць легкавога транспарту перад польскім пунктам пропуску Тэрэспаль (Брэст) павялічылася на 545 адзінак. За выходныя дні сумежны бок прыняў на сваю тэрыторыю ўсяго 34% аўто ад нормы, — заявілі з Памежным камітэце. 

Апоўдні па мінскім часе колькасць легкавых аўтамабіляў вырасла да 1335. 

Вось што пісалі карыстальнікі наконт чэргаў на мяжы з Польшчай у каментарах на канале Dzik Pic.

• «Чарга ідзе з хуткасцю ~16 аўто на гадзіну».
• «Муж устаў у чацвер вечарам, праехаў у суботу днём, 44 гадзіны».
• «Жонка трапіла на пачатак росту чаргі: 720 машын. Прыйшлося падоўжыць на наступныя суткі кватэру. Усяго 45,5 гадзін: 39 у электроннай чарзе і 6,5 на мяжы».

Раней мытнікі змянілі для транспарту правілы праходжання беларуска-польскай мяжы. Навіна закранула рэгістрацыю транспартных сродкаў у зоне чакання.

Уладальнікі транспартных сродкаў цяпер могуць рэгістравацца ў электроннай чарзе на праходжанне мяжы.

Пасля рэгістрацыі яны змогуць або заставацца ў агульнай чарзе, або пакінуць зону чакання і з’ехаць у любое зручнае месца. Сачыць за чаргой можна будзе ў сістэме на сайце «Белмытнясэрвісу». Таксама можна будзе звязацца з аператарам, які ў патрэбны час выкліча ў зону чакання.

Што тычыцца іншых пунктаў пропуску, то, паводле звестак беларускіх памежнікаў, на раніцу панядзелка сітуацыя там была спакайнейшай. 

У пункт пропуску «Каменны Лог» (на Літву) на выезд з Беларусі было 10 аўтамабіляў і 0 аўтобусаў, у пункце пропуску «Беняконі» (на Літву) таксама 10 аўто і 0 аўтобусаў.

У пункт пропуску «Грыгароўшчына» (на Латвію) у чарзе на выезд з Беларусі не было легкавых аўтамабіляў і аўтобусаў.