🎮 Гульнявы маркетплейс Skich запускае альтэрнатыўную краму аплікацый для iOS у ЕС

Новая крама аплікацый атрымала назву Skich Store і дае карыстальнікам магчымасць не толькі запампоўваць гульні ад незалежных распрацоўшчыкаў, але і атрымліваць персаналізаваныя рэкамендацыі на падставе іх пераваг. Паводле прадстаўнікоў платформы, Skich Store прызначаны для таго, каб вырашыць праблему пошуку прыдатных гульняў для геймераў і павысіць бачнасць распрацоўшчыкаў ва ўмовах росту канкурэнцыі.

Адна з галоўных асаблівасцей Skich Store — гэта сістэма рэкамендацый, якая ахоплівае больш за 240 жанраў гульняў, што ў 14 разоў перавышае колькасць жанраў, прадстаўленых у App Store. Гэта дазволіць гульцам знаходзіць менавіта тыя гульні, што адпавядаюць іх інтарэсам.

Акрамя таго, у Skich Store рэалізаваная сістэма пошуку новых гульняў, падобная да аплікацый для знаёмстваў: карыстальнікі змогуць свайпнуць направа, каб захаваць гульню, што спадабалася, або налева — каб прапусціць яе. У краме таксама будуць даступныя спісы гульняў і функцыі сацыяльнага ўзаемадзеяння, што дазволіць бачыць, у што гуляюць і што раяць сябры.

Аплікацыя таксама дапаможа знаходзіць гульні, даступныя ў App Store, забяспечваючы дадатковую бачнасць распрацоўшчыкам. Skich Store ужо даступны для запампоўкі на iOS з афіцыйнага сайта платформы. Аднак скарыстацца новай крамай змогуць толькі карыстальнікі iPhone і iPad, якія знаходзяцца ў межах Еўрапейскага Саюза. Арыгінальная аплікацыя Skich для пошуку новых гульняў застаецца даступнай па ўсім свеце ў App Store.

Кампанія будзе спаганяць камісію ў памеры 15% з усіх пакупак, здзейсненых унутры Skich Store, а таксама з усіх унутрыгульнявых пакупак у гульнях, запампаваных праз гэты маркетплэйс. Для параўнання, Apple спаганяе значна большую камісію — 30% з даходаў распрацоўшчыкаў у сваім App Store, што робіць прапанову Skich патэнцыйна больш прывабнай.