У Эміратах будуць навучаць ШІ ўжо ў дзіцячым садку

«Штучны інтэлект зменіць свет. Наша мэта — даць дзецям глыбокае разуменне ШІ, уключаючы тэхнічныя аспекты, этыку, даныя і алгарытмы, а таксама іх сувязь з грамадствам», — заявіў прэм’ер-міністр ААЭ, шэйх Мухамед бен Рашыд Аль Мактум. Ён падкрэсліў, што праграма накіраваная на падрыхтоўку моладзі да будучыні, у якой тэхналогіі стануць асновай эканомікі і штодзённага жыцця.

Праграма ахоплівае сем ключавых напрамкаў: асновы ШІ, даныя і алгарытмы, праграмнае забеспячэнне, этыка, рэальныя аплікацыі, інавацыі і палітыка. Навучальныя модулі адаптаваныя для розных узроставых груп:

• Дзіцячы сад: знаёмства з ШІ праз інтэрактыўныя гульні і гісторыі;
• Пачатковая школа (Cycle 1): параўнанне машын і людзей, развіццё лічбавага мыслення;
• Сярэдняя школа (Cycle 2): праектаванне сістэм ШІ, вывучэнне алгарытмаў і этыкі;
• Старэйшая школа (Cycle 3): падрыхтоўка да кар’еры праз камандную распрацоўку і мадэляванне рэальных сцэнараў.

Праграма стане часткай прадмета «Вылічэнні, крэатыўны дызайн і інавацыі». Настаўнікі атрымаюць метадычныя дапаможнікі і планы заняткаў. Ініцыятыву падтрымліваюць вядучыя арганізацыі краіны ў сферы ШІ, уключаючы Універсітэт штучнага інтэлекту імя Мухамеда бен Заіда (MBZUAI), кампаніі Presight і AI71, а таксама Педагагічны каледж Emirates. Гэтыя арганізацыі дапамогуць укараняць перадавыя тэхналогіі ў адукацыю.

Паралельна з рэформай школьнай адукацыі спадчынны прынц Дубая, шэйх Хамдан бен Мухамед бен Рашыд Аль Мактум, запусціў Акадэмію ШІ Дубая ў межах кампуса ШІ Дубая. Акадэмія плануе навучыць 10 000 чалавек па праграмах, распрацаваных сумесна з Оксфардскім універсітэтам, Udacity і Minerva Project. Курсы, такія як «ШІ для дзяржаўнай службы» і «Лідарства ў эпоху ШІ», будуць сканцэнтраваныя на стратэгіі і этыцы тэхналогій.