У інвестараў вельмі простыя чаканні ад кампаній: выдаткоўвайце на ШІ колькі заўгодна, але пакажыце, што гэта ўжо прыносіць грошы. Калі не — вас пакараюць, піша Reuters.
У інвестараў вельмі простыя чаканні ад кампаній: выдаткоўвайце на ШІ колькі заўгодна, але пакажыце, што гэта ўжо прыносіць грошы. Калі не — вас пакараюць, піша Reuters.
На гэтым тыдні гэта стала асабліва заўважна на прыкладзе Microsoft і Meta. Пасля справаздач Microsoft упала на 10% і страціла больш за $350 млрд рынкавай капіталізацыі. Meta, наадварот, вырасла на 10%. І гэта пры тым, што ў Microsoft за справаздачны перыяд (2 квартал 2026 фінансавага года) выручка склала $81,3 млрд (+17%), а чысты прыбытак — $30,9 млрд (+23%). Microsoft усё яшчэ даражэй за Meta — $3,2 трлн супраць $1,86 трлн. Але за апошнія два гады акцыі Meta выраслі на 87%, а Microsoft — усяго на 7%.
Сітуацыю Microsoft нельга назваць правальнай, але яна і не вясёлкавая. Рост воблачнага бізнесу Azure аказаўся толькі крыху вышэй за чаканні. Для кампаніі, якая ў 2024 годзе стала самай дарагой у свеце дзякуючы ранняй стаўцы на OpenAI, гэтага ўжо недастаткова. Інвестары хочуць аддачы ад велізарных укладанняў. Толькі за кастрычнік–снежань Microsoft патраціла $37,5 млрд капіталаўкладанняў, але абяцае запаволіць выдаткі ў бягучым квартале.
З’явілася яшчэ адна трывожная дэталь: 45% воблачнага бэклогу Microsoft звязана з OpenAI. Калі ў OpenAI пачнуцца праблемы (а канкурэнцыя з Google і Anthropic узмацняецца), пад пагрозай могуць апынуцца будучыя заказы на суму да $280 млрд. Аналітыкі прама кажуць пра «канцэнтрацыйную рызыку», гэта значыць пра занадта моцную залежнасць ад аднаго партнёра.
У Meta іншая карціна. ШІ рэальна ўзмацніў рэкламны таргетынг: выручка ў 4 квартале вырасла на 24%, а ў бягучым квартале кампанія чакае паскарэння росту аж да 33%. То бок ШІ не проста стратэгія на будучыню, а ўжо крыніца грошай, якая дапамагае фінансаваць рэзкі рост выдаткаў. Капіталаўкладанні Meta могуць вырасці на 87%, да $135 млрд, а агульныя выдаткі ў гэтым годзе павялічацца на 43%, да $169 млрд. Але рынак гэта прымае, бо даходы таксама растуць. Цукерберг лічыць, што ШІ палепшыць карыстальніцкі досвед і рэкламу — і гэта дасць «назапашвальны эфект».
У той жа бок рухаецца Tesla. Кампанія плануе падвоіць выдаткі да больш чым $20 млрд і робіць стаўку на ШІ, гуманоідных робатаў і беспілотныя аўтамабілі. Пры гэтым квартальны прыбытак і выручка аказаліся вышэй за чаканні, і акцыі выраслі амаль на 3%. Хоць у цэлым год стаў для кампаніі не лепшым.
То бок рынак больш не купляе проста «гісторыю пра ШІ» — пасля трох гадоў хайпу інвестары хочуць бачыць, што велізарныя капітальныя выдаткі канвертуюцца ў рэальны рост выручкі. Калі гэта адбываецца, як у Meta, акцыі растуць, нягледзячы на касмічныя бюджэты. Калі не, як у выпадку Microsoft, нават невялікае расчараванне можа каштаваць сотні мільярдаў капіталізацыі.
Рэлацыраваліся? Цяпер вы можаце каментаваць без верыфікацыі акаўнта.