Николай Чикишев 9 лістапада 2022, 13:11

Інжынер Twitter заявіў, што яго звольнілі за дапамогу калегам, якія сутыкнуліся са звальненнямі

Былы інжынер сацсеткі абвінаваціў кампанію ў несправядлівым звальненні і падаў калектыўны пазоў у суд Каліфорніі.

Інжынер Эмануэль Корнэт падаў скаргу ў Нацыянальную раду па працоўных адносінах ЗША. Заяўнік сцвярджае, што ён распрацаваў інструмент, які дазваляў працаўнікам кампаніі захоўваць важныя дакументы ў чаканні масавых звальненняў. Корнэт перакананы, што ён займаўся абароненай працоўным правам дзейнасцю, калі дзяліўся па ўнутраных каналах са сваімі калегамі.

Распрацаваны інжынерам інструмент — гэта пашырэнне для Google Chrome, якое дазваляе супрацоўнікам запампоўваць электронныя лісты са сваіх акаўнтаў у Twitter. Паводле яго слоў, гэта гарантавала б, што працаўнікі змогуць захоўваць важныя дакументы, напрыклад, заявы, агляды прадукцыйнасці і іншыя доказы іх працы.

У скарзе былы супрацоўнік Twitter пазначыў, што быў звольнены 1 лістапада, пасля таго, як ён апублікаваў пашырэнне і размясціў спасылку на яго ва ўнутраным канале. Звальненне адбылося за некалькі дзён да таго, як кампанія пачала скарачаць каля паловы штату са сваіх 7500 супрацоўнікаў. Twitter выдаліў спасылку Корнэта ў той жа дзень.

Таксама Корнэт і яшчэ чатыры іншыя былыя працаўнікі Twitter падалі пазоў у федэральны суд Каліфорніі, абвінаваціўшы сацсетку ў парушэнні федэральных законаў і законаў штата, якія патрабуюць ад працадаўцы паведамлення за 60 дзён да пачатку масавых звальненняў.

Скарачэнні адбыліся на патрабаванне Маска, які такім парадкам пасля куплі сацсеткі спрабуе скараціць яе выдаткі. Раней Маск заявіў, што звольненым працаўнікам Twitter была прапанаваная 90-дзённая выхадная дапамога, якая магла б задаволіць забавязанні Twitter у адпаведнасці з законамі пра паведамленне.