Іспанія абвінаваціла Airbnb у жыллёвым крызісе і загадала прыбраць 65 тысяч аб’яў

У асноўным гаворка ідзе пра аб’явы, што павінны быць заблакаваныя з-за няправільнага афармлення — у іх не пазначаны ліцэнзійны нумар. У некаторых аб’явах таксама не ўказана, хто з’яўляецца ўласнікам нерухомасці — фізічная асоба ці кампанія. Кіраўнік ведамства Пабла Бустындуй падкрэсліў, што мае намер пакласці канец некантраляванаму і незаконнаму бізнесу ў сферы кароткатэрміновай арэнды. «Болей ніякіх апраўданняў. Хопіць абараняць тых, хто робіць бізнес на праве на забеспячэнне жыллём у нашай краіне», — заявіў ён.

Урад Іспаніі разам з гарадскімі і рэгіянальнымі ўладамі пачаў кампанію супраць такіх пляцовак, як Airbnb і Booking, пасля таго як многія мясцовыя жыхары сталі скардзіцца на тое, што з-за іх у краіны прыязджае занадта шмат турыстаў. У выніку даступнага жылля стала менш, і многія мясцовыя не могуць сабе дазволіць арэнду.

Як адзначае Reuters, жыллёвае пытанне ў Іспаніі даволі вострае — тэмпы будаўніцтва нерухомасці не паспяваюць за попытам. Паводле афіцыйных дадзеных, да лістапада мінулага года ў краіне налічвалася каля 321 тысячы жылых аб’ектаў з дазволам на арэнду — на 15% больш, чым у 2020 годзе. Аднак значна большая колькасць уласнікаў працуе без ліцэнзіі.

У снежні згаданае міністэрства пачало расследаванне ў дачыненні да Airbnb. Тады кампанія заяўляла, што заўсёды патрабуе ад арэндадаўцаў ліцэнзію і просіць выконваць закон. У Airbnb сцвярджалі, што міністэрства не прадаставіла спісы парушальнікаў, а многім уласнікам ліцэнзія наогул не патрэбная, каб здаваць сваю нерухомасць. Таксама там падкрэслівалі, што кароткатэрміновая арэнда выходзіць за межы кампетэнцыі міністэрства, і што Airbnb — гэта лічбавая, а не рыэлтарская кампанія.