Іспанія забараніла Meta збіраць звесткі пра сваіх выбаршчыкаў

AEPD паведаміла Meta пра забарону збору і апрацоўкі даных пра выбаршчыкаў у Іспаніі перад еўрапейскімі выбарамі, якія пройдуць у чэрвені. Гаворка вядзецца пра функцыі Election Day Information І voter Information Unit у Facebook і Instagram. Забарона можа доўжыцца да трох месяцаў.

Згодна з агульным рэгламентам абароны даных ЕС (GDPR), вядучым рэгулятарам Meta ў ЕС з’яўляецца Камісія па абароне даных Ірландыі. Аднак нацыянальныя органы ў іншых краінах маюць права выкарыстоўваць надзвычайныя паўнамоцтвы, калі яны бачаць неадкладныя рызыкі для карыстальнікаў на сваёй тэрыторыі.

«Гэтае рашэнне заснаванае на выключных абставінах, у якіх неабходна прыняць меры для прадухілення збору даных, прафілявання карыстальнікаў і перадачы інфармацыі трэцім асобам, тым самым прадухіляючы выкарыстанне персанальных даных невядомымі аператарамі і ў няяўных мэтах», — заявілі ў AEPD.

Палітычныя погляды класіфікуюцца як даныя «асаблівай катэгорыі» ў адпаведнасці з агульнаеўрапейскім рэгуляваннем, якое патрабуе вышэйшага ўзроўню атрымання відавочнай згоды карыстальніка на апрацоўку. Meta заявіла, што не згодная з рашэннем агенцтва, але супрацоўнічае з рэгулятарам у гэтым пытанні.