Лідзіруе толькі па заробках, а страты растуць. Як маецца беларускі ІТ-сектар у 2024 годзе?

Зарплата — 1-е месца

Па ўзроўні сярэдняй зарплаты ў Беларусі ІТ-сектар застаецца на першым месцы сярод іншых галін. Але лідарства айцішнікаў ужо не такое безумоўнае, як раней. 

Паводле звестак афіцыйнай статыстыкі, па выніках ліпеня сярэдні заробак у ІТ склаў 6,8 тысячы рублёў. Гэта ўсяго толькі на 2% больш за даходы супрацоўнікаў пасажырскага паветранага транспарту.

Для параўнання: год таму (у ліпені 2023) заробак у ІТ быў вышэйшы, чым у работнікаў пасажырскага паветранага транспарту, на 45%. 

Уплыў на рост ВУП — 6-е месца

З аднаго боку, упершыню амаль за два гады ІТ-сектар перастаў тармазіць эканоміку. З другога, уплыў індустрыі на яе рост мінімальны на фоне астатніх галін.

Але доля сферы інфармацыйна-камунікацыйных тэхналогій (ІКТ) у ВУП працягвае расці. Па выніках студзеня гэтага года доля была 3,8%, па выніках студзеня-мая — 4,5%, за студзень–ліпень — 4,9%. Па гэтым паказчыку ІКТ — на 4-м месцы сярод асноўных галін. 

Адначасова аднавіўся рост валавой дабаўленай вартасці ІКТ-сектара (розніца паміж выдаткамі на вытворчасць і канчатковым коштам прадукту). За студзень-ліпень — плюс 0,2%. Папярэднія шэсць месяцаў быў суцэльны мінус. 

Выручка — 13-е месца

Па росце выручкі па выніках паўгоддзя ІКТ па-за межамі топа-10. За студзень-чэрвень яна вырасла на 8,8% — гэта 13-е месца сярод асноўных відаў дзейнасці. 

Рэнтабельнасць — 4-е месца

Летась сектар выпаў з топа-3 самых эфектыўных у беларускай эканоміцы — упершыню за апошнія некалькі гадоў.

За шэсць месяцаў гэтага года рэнтабельнасць продажаў у ІТ і сувязі склала 18,6%. Гэта 4-е месца сярод самых эфектыўных відаў дзейнасці.

Чысты прыбытак — 4-е месца

Сёлета сітуацыя з чыстым прыбыткам у ІКТ пакуль горшая за леташнюю. За паўгода кампаніі сектара атрымалі 800 млн рублёў чыстага прыбытку — на 6%, або на 56 млн рублёў менш, чым год таму. 

Колькасць стратных кампаній — 7-е месца

За паўгоддзе Белстат налічыў у ІТ і сувязі 42 стратныя кампаніі — амаль у 1,5 разу больш, чым па выніках студзеня-чэрвеня мінулага года. Па колькасці стратных бізнэсаў сектар — на 7-м месцы сярод асноўных відаў дзейнасці. 

Страты ў галіны выраслі. За студзень–чэрвень кампаніі атрымалі 54,5 млн рублёў страт — на 77% больш, чым летась (было 30,7 млн рублёў).