У Microsoft пачаліся новыя скарачэнні. Некаторыя супрацоўнікі не атрымаюць выходнай дапамогі

Прычынай звальнення супрацоўнікаў стала тое, што «іх прадукцыйнасць не адпавядае мінімальным стандартам і чаканням для іх пазіцыі», тлумачыцца ў лістах. Ад моманту атрымання ліста яны вызваляюцца ад выканання ўсіх сваіх абавязкаў, а доступ да карпаратыўных сістэм, акаўнтаў і будынкаў анулюецца ў той жа дзень. Таксама ад гэтага часу ім забараняецца выконваць хоць якую працу ад імя Microsoft.

Ад дня звальнення кампанія спыняе аплату супрацоўнікам медабслугоўвання, лекаў па рэцэптах і стаматалогіі. Згадак пра выходную дапамогу ў лісце няма. Але, паводле слоў суразмоўцаў выдання, мінімум у трох выпадках Microsoft сказала супрацоўнікам, што яны яе не атрымаюць. Таксама ў лісце гаворыцца, што Microsoft будзе ўлічваць былую прадукцыйнасць і факт звальнення ў тым выпадку, калі ў далейшым супрацоўнік захоча ўладкавацца на іншыя пазіцыі ў кампаніі.

Раней Business Insider паведамляў, што Microsoft, як і яе канкурэнты, стала стражэй падыходзіць да кіравання эфектыўнасцю супрацоўнікаў, а менеджары апошнія месяцы праводзілі ацэнку супрацоўнікаў аж да ўзроўню 80, то-бок кіраўнікоў тэхналагічных напрамкаў. Кампанія дапускала, што будзе запаўняць вызваленыя пазіцыі, таму агульная колькасць яе штату, якая станам на мінулы чэрвень складала каля 228 тысяч чалавек, істотна не зменіцца.