Выдаўцы прайгралі суд у ЗША: навучаць ШІ на кнігах можна, піраціць — не

Федэральны суд ЗША прызнаў законным выкарыстанне кніг для навучання ШІ кампаніяй Anthropic, але пастанавіў, што пытанне аб захоўванні піратскіх копій твораў павінна быць разгледжана на асобным судовым працэсе ў снежні.

Суддзя Уільям Олсап пастанавіў, што Anthropic, распрацоўшчык моўнай мадэлі Claude, дзейнічала ў рамках дактрыны fair use (добрасумленнага выкарыстання), навучаючы ШІ на кнігах аўтараў Андрэа Барц, Чарльза Грэбера і Кірка Уолеса Джонсана.

На думку суда, навучанне ШІ з’яўляецца «трансфармуючым выкарыстаннем», паколькі мадэль не капіруе стыль або выразы аўтараў, а стварае арыгінальны тэкст на аснове выцягнутай інфармацыі. «Як любы чытач, які марыць стаць пісьменнікам, мадэль вучыцца не для пераймання, а для стварэння чагосьці іншага», — напісаў Олсап у рашэнні.

Аднак суддзя таксама адзначыў, што Anthropic парушыла аўтарскія правы, захоўваючы больш за 7 мільёнаў піратскіх кніг у так званай «цэнтральнай бібліятэцы», нават калі гэтыя кнігі не былі непасрэдна выкарыстаны ў навучанні мадэлі. Гэта выкарыстанне не можа лічыцца добрасумленным і падлягае разбору ў судзе прысяжных, прызначаным на снежань.

Згодна з амерыканскім заканадаўствам, за наўмыснае парушэнне аўтарскіх правоў можа быць прызначана кампенсацыя да $150 000 за кожны твор.

Пазоў супраць Anthropic быў пададзены ў 2024 годзе групай аўтараў, якія заявілі, што кампанія пабудавала мультымільярдны бізнес, навучаючы ШІ на незаконна запампаваных кнігах. Кампанію падтрымліваюць такія тэхналагічныя гіганты, як Amazon і Alphabet. Падобныя пазовы ў цяперашні час разглядаюцца таксама ў дачыненні да OpenAI, Meta і іншых гульцоў індустрыі ШІ.