Кітай актыўна ўкараняе штучны інтэлект у ваенную сферу: ад раёў дронаў і аўтаномных падводных апаратаў да сістэм прыняцця рашэнняў і інструментаў дэзынфармацыі на базе дыпфэйкаў.
Кітай актыўна ўкараняе штучны інтэлект у ваенную сферу: ад раёў дронаў і аўтаномных падводных апаратаў да сістэм прыняцця рашэнняў і інструментаў дэзынфармацыі на базе дыпфэйкаў.
Да такой высновы прыйшлі даследчыкі з Цэнтра бяспекі і новых тэхналогій (CSET) пры Джорджтаўнскім універсітэце, прааналізаваўшы адкрытыя закупачныя заяўкі Народна-вызваленчай арміі Кітая (НВАК) за апошнія тры гады.
Аўтары даследавання адзначаюць, што маштаб і тэмпы эксперыментаў указваюць на пераход Кітая да новай фазы ваеннай мадэрнізацыі, якую ў Пекіне называюць «інтэлектуалізаванай вайной». Калі раней мадэрнізацыя ішла праз механізацыю і лічбавую інтэграцыю платформаў і сэнсараў, то цяпер акцэнт робіцца на аўтаматызацыю аперацый і прыняцце рашэнняў з дапамогай ШІ.
Сярод зафіксаваных напрамкаў — распрацоўка роя беспілотнікаў, здольных самастойна выяўляць і атакаваць мэты, стварэнне робатызаваных платформаў, уключаючы «робасабак» і гуманоідных робатаў, а таксама алгарытмаў для касмічнага супрацьстаяння.
У дакументах згадваюцца малыя апараты, прызначаныя для збліжэння з варожымі спадарожнікамі і іх вывядзення з ладу. У падводнай сферы Кітай інвестуе ў аўтаномныя апараты і сэнсарныя сеткі з мэтай глабальнага адсочвання падводных лодак, у тым ліку амерыканскіх.
Асобная ўвага надаецца сістэмам падтрымкі прыняцця рашэнняў. На думку даследчыкаў, кітайскае кіраўніцтва імкнецца кампенсаваць абмежаваны баявы досвед афіцэрскага корпуса з дапамогай ШІ. Алгарытмы павінны прагназаваць дзеянні праціўніка і мадэляваць развіццё канфлікту. Ваенныя ўжо выкарыстоўваюць віртуальныя сімуляцыі для адпрацоўкі сцэнарыяў і аналізу паводзін патэнцыйных супернікаў.
Закупачныя дакументы таксама сведчаць аб развіцці «кагнітыўнай вайны». НВАК цікавіцца тэхналогіямі дыпфэйкаў — генерацыяй выяваў, відэа і аўдыё для інфармацыйнага ўздзеяння. ШІ разглядаецца як інструмент уплыву на грамадскую думку за мяжой і фарміравання скажонага ўспрыняцця падзей у праціўніка.
Даследчыкі сцвярджаюць, што Пекін робіць стаўку не на чаканне тэхналагічных прарываў, а на хуткія і недарагія эксперыменты. Закупкі часта прадугледжваюць кароткія тэрміны распрацоўкі, а грамадзянскія тэхналагічныя кампаніі атрымліваюць субсідыі і падатковыя льготы за адаптацыю сваіх рашэнняў для арміі. Такая мадэль «грамадзянска-ваеннай інтэграцыі» дазваляе Кітаю выкарыстоўваць дасягненні ў робататэхніцы, вытворчасці і акумулятарных тэхналогіях.
Пры гэтым аўтары ўказваюць на рызыкі празмернай аўтаматызацыі. Калі ШІ-сістэмы пачнуць падмяняць чалавечае меркаванне, гэта можа прывесці да памылковай інтэрпрэтацыі сігналаў і непрадугледжанай эскалацыі. Дадатковую небяспеку ўяўляе магчымасць маніпуляванння інфармацыйным асяроддзем для ўвядзення ў зман алгарытмаў праціўніка.
Па ацэнцы даследчыкаў, ЗША па-ранейшаму захоўваюць перавагі ў вылічальных магутнасцях, тэхнічных кадрах і баявым досведзе. Аднак павольныя працэдуры закупак і напружаныя адносіны з вядучымі ШІ-кампаніямі аслабляюць пазіцыі Вашынгтона. У даследаванні гаворыцца, што для захавання перавагі неабходны больш шчыльныя партнёрствы з распрацоўшчыкамі ШІ і абнаўленне стандартаў выкарыстання ваенных ШІ-сістэм.
Релоцировались? Теперь вы можете комментировать без верификации аккаунта.