Каманда, што робіць «Яндэкс Таксі» для пяску і друзу, перамагла ў стартап-марафоне «Белаграпрамбанка»

Як расказаў адзін з распрацоўшчыкаў платформы Цім Курчонак, на першым этапе ў конкурсе ўдзельнічалі 93 каманды. Затым па выніках выступленняў 20 з іх адабралі на наступны этап — акселерацыю. «Ён доўжыўся два месяцы, банк аплачваў працу экспертаў, якія суправаджалі стартапы», — падзяліўся падрабязнасцямі наш суразмоўца.

У фінале быў demo day, у рамках якога стартапы прэзентавалі свае прадукты. На пітч кожнай камандзе адвялі па 3 хвіліны, плюс яшчэ 7 хвілін — на адказы на пытанні.

Нагадаем, што dev.by ужо пісаў пра Kliffort. Гэта мабільная праграма, праз якую можна заказаць любыя сыпкія будматэрыялы — заснавальнікі жартам называюць яго «Яндэкс Таксі» для пяску і друзу». Як адзначае Цім, ягоная каманда «не проста робіць зручную праграму, але і, дзякуючы аптымізацыі лагістыкі, зніжае кошт дастаўкі». 

Працуюць над Kliffort 10 чалавек. Пяць з іх — супрацоўнікі EPAM. Ёсць таксама сістэмны архітэктар, ён працаваў над e-dostavka. Частка каманды працуе фул-тайм, частка — парт-тайм. Усе ў розных гарадах Беларусі, а адзін чалавек — у Грузіі. Дарэчы, у CTO стартапа ў мінулым была свая будаўнічая кампанія, «так што ён глыбока ў тэме». 

Цім Курчонак праводзіў паўнавартаснае даследаванне рынку сыпкіх будматэрыялаў, і лічыць, што ён «суперперспектыўны».

— Рынак расце нягледзячы на крызіс. За 2024 год у Беларусі ён ацэньваецца ў $450 млн. А значыць мы, як маладая кампанія, можам дасягнуць $4,5 млн. на працягу трох гадоў пры належным аб’ёме інвестыцый.

Стартаперы маюць намер пасля запусціцца і ў іншых краінах — «усюды, дзе ёсць пясчаныя і жвіровыя кар’еры» — і прыцягваць інвестыцыі па ўсім СНД.