Каму з айцішнікаў і фрылансераў дазваляюць новы падатак, а каму не
Падаткавікі апублікавалі кейсы дапасавання арт. 7. Логіка туманнага артыкула наконт «працы праз інтэрнэт» стала крыху больш зразумелай.
З тлумачэнняў МПЗ вынікае, што 7-ы артыкул (Закона РБ ад 30 снежня 2022 г. No 230-З «Аб змяненні законаў у пытаннях падаткаабкладання») — якраз для айцішнікаў-фрылансераў. Яны працуюць праз інтэрнэт, і ім без сумневаў можна пераходзіць на падатак на прафдаход.
Але паводле якіх крытэраў паслугі належаць да сферы ІТ? Ці гэта толькі тэхнічныя работы — распрацоўка і тэсціраванне? Ці можна па ППД аказваць паслугі: бізнэс-аналізу, дызайну, тэхрайтынгу, рэкрутынгу і г. д.?
Логіка дапасавання 7-га артыкула стала крыху больш зразумелай дзякуючы раздзелу «пытанне — адказ» на сайце МПЗ. dev.by вывучыў апублікаваныя кейсы і пасартаваў заняткі/спецыяльнасці паводле прыкметы «можна» і «няможна» ў ППД.
Вось пра якія віды дзейнасці стала больш зразумела.
Можна ў ППД
- дзейнасць у галіне камп’ютэрнага праграмавання (падклас 62010 АКЭД);
Падклас 62010 ўключае (адкрыйце спойлер)
- распрацоўку структуры і змесціва камп’ютарных кодаў і (або) напісанне камп’ютарных кодаў, неабходных для стварэння і функцыянавання: сістэмнага праграмнага забеспячэння (уключаючы абнаўленні, змены і дапаўненні да праграмнага забеспячэння); прыкладнога праграмнага забеспячэння (уключаючы абнаўленні, змены і дапаўненні да праграмнага забеспячэння); баз даных; вэб-сайтаў;
- змену праграмнага забеспячэння на заказ кліента, то-бок мадыфікацыю і канфігурацыю існай прыкладной праграмы такім чынам, каб яна функцыянавала ў праграмным асяроддзі інфармацыйнай сістэмы кліента;
- праектаванне, распрацоўку і ўкараненне ўнутрыкарпаратыўных, віртуальных прыватных і да т. п. сетак, а таксама сродкаў бяспекі сеткі (уключаючы праграмнае забеспячэнне, камп’ютарнае апаратнае абсталяванне і працэдуры, якія забяспечваюць бяспечны абмен інфармацыяй).
- фрыланс праз анлайн-пляцоўкі накшталт Upwork;
- стварэнне відэакантэнту, відэамантаж (праз інтэрнэт);
- менеджар па працы з маркетплэйсамі (праз інтэрнэт);
- вёрстка электроннага часопіса (праз інтэрнэт);
- рэкрутынг (падклас 78100 АКЭД «Дзейнасць агенцтваў па працаўладкаванні»);
- таргетынг (наладжванне рэкламы ў сацсетках, стварэнне карцінкі, рэкламнага тэксту);
- прадастаўленне месца і часу для рэкламы ў інтэрнэце (акрамя рэкламы ў СМІ ў інтэрнэце)
У апошні пункт уваходзяць у тым ліку:
- распрацоўка мабільных праграм (гульняў) з наступнай публікацыяй у маркетплэйсе, пры гэтым даход паступае ад рэкламы ў гульнях.
- відэаблогінг, вядзенне сайта з атрыманнем даходу ад інтэрнэт-рэкламы, напрыклад, паводле дамовы з Google AdSense або пры ўсталяванні рэкламнага кода Яндэкс.
Фізасоба займаецца распрацоўкай мабільных праграм (гульняў) з наступнай публікацыяй іх у Google Play. Праграмы распрацоўваюцца і публікуюцца без пасярэднікаў, самастойна. Тэмы (ідэі) праграм (гульняў) фізасоба таксама фарміруе самастойна. У праграмы (гульні) дададзены код AdMob (AdSense), які дазваляе манетызаваць працу — паказваючы карыстальнікам рэкламу. Раз на месяц AdMob (AdSense) высылае плацеж за мінулы месяц.
МПЗ: Фізасоба мае права ўжыць падатак на прафесійны даход у дачыненні да дзейнасці па прадастаўленні месца для рэкламы на сваіх сайтах, у сваіх мабільных праграмах, калі выкананне работ (аказанне паслуг) ажыццяўляецца на заказ іншых фізічных асоб, у тым ліку зарэгістраваных у якасці ІП і (або) арганізацый па-за месцам знаходжання заказчыка (яго філіяла, іншага адасобленага структурнага падраздзялення), тэрыторыі або аб’екта, якія знаходзяцца пад кантролем заказчыка, з выкарыстаннем для выканання такіх работ (аказання такіх паслуг) і перадачы вынікаў выкананых работ (аказаных паслуг) сеткі Інтэрнэт.
Калі не выконваецца хаця б адная з пералічаных вышэй умоў, фізічная асоба не мае права прымяніць падатак на прафесійны даход.
Пры рэалізацыі мабільных праграм падатак на прафесійны даход не ўжываецца.
- разлік каштарыснай вартасці аб’екта будаўніцтва (праз інтэрнэт).
Няможна ў ППД, нягледзячы на інтэрнэт
- распрацоўка софту без заказчыка з продажам праз пляцоўкі-рэсэлеры накшталт FastSpring і PayPro;
Чаму няможна
МПЗ: «Рэалізацыя (у адрозненне, напрыклад, ад стварэння праграм на заказ іншых асоб) створаных самастойна камп’ютарных праграм за мяжу аддалена з выкарыстаннем сеткі Інтэрнэт праз пляцоўкі-рэсэлеры накшталт FastSpring і PayPro не ўключаная ў пералік відаў дзейнасці, якія ажыццяўляюцца фізічнымі асобамі — плацельшчыкамі ППД, вызначаны пастановай Саўміна РБ ад 8 снежня 2022 г. № 851, і не прадугледжаная артыкулам 7 Закона РБ ад 30 снежня 2022 г. № 230-З». - коўчынг, анлайн-курсы;
Чаму няможна
На думку МПЗ, гэта адукацыйная дзейнасць, яе могуць ажыццяўляць толькі суб’екты гаспадарання — арганізацыі і ІП.
- псіхалагічныя кансультацыі анлайн;
Чаму няможна
МПЗ: «Дзейнасць псіхолагаў, уключаючы псіхалагічнае кансультаванне, не належыць да відаў дзейнасці, магчымых для прымянення ППД».
- майнінг;
- праца на біржы, інвестыцыі, крыптавалюта.
Што ў выніку
Паслугоўваючыся гэтай логікай, дызайнерам, тэсціроўшчыкам, бізнэс-аналітыкам, тэхрайтарам, капірайтарам працаваць з выплатай ППД таксама можна.
Псіхолагам, фітнэс-трэнерам ды іншым коўчам дакладна ну.
Выкладчыкам ІТ-дысцыплін і англійскай складана: ім трэба памятаць, што яны займаюцца рэпетытарствам, а не адукацыйнай дзейнасцю.
Няможна на ППД атрымліваць прыбытак ад продажу сваіх праграм на маркетплэйсах, але заліваць іх на маркетплэйсы і атрымліваць прыбытак ад рэкламы можна.
Выводзіць грошы з фрыланс-біржаў з выплатай ППД таксама можна.
Калі вы сумняваецеся, ці можна вам у ППД, лепш задаць пытанне наўпрост падаткавікам.
Читать на dev.by