Карпарацыі будуюць бункеры, каб выратаваць даныя і кіраўніцтва ад ядзернай вайны

Паводле слоў кампаній, якія займаюцца будаўніцтвам такіх аб’ектаў, попыт на бункеры абумоўлены, перш за ўсё, усё большай каштоўнасцю даных. Кампанія Iron Mountain, якая займаецца кіраваннем інфармацыяй, пачала сваю дзейнасць яшчэ ў 1950-х гадах, прапаноўваючы банкам бяспечнае сховішча ў выпрацаванай шахце па здабычы жалезнай руды, у перыяд хвалі страхаў перад ядзернай вайной.

Лары Хол, уладальнік кампаніі Survival Condo з Канзаса, паведаміў, што нядаўна ацаніў кошт падземнага цэнтра апрацоўкі даных і прадстаўніцкага люкса для крыптакампаніі ў $64 мільёны. Хол налічвае восем кампаній, якія знаходзяцца на стадыі планавання будаўніцтва бункераў, тры з якіх канкуруюць за куплю існага аб’екта плошчай каля 14 000 квадратных метраў у Канзасе, прызначанага для тых жа мэт. Гэты праект быў пачаты мільярдэрам з Big Oil, які памёр, не паспеўшы яго завяршыць.

Павышаная цікавасць да бункераў таксама звязаная з ростам колькасці стыхійных бедстваў і пагаршэннем адносін паміж заходнімі краінамі і такімі супернікамі, як Расія і Паўночная Карэя. Еўрапейскія кліенты асцерагаюцца, што канфлікты ва Украіне і на Блізкім Усходзе могуць неўзабаве закрануць і іх.

Бункер, пабудаваны на глыбіні 60 футаў пад зямлёй з бетоннымі сценамі таўшчынёй дзевяць футаў, як будуе Survival Condo, можа забяспечыць прытулак. Кампанія стварае свае аб’екты на ўзор ракетных шахт Atlas-F, створаных у часе халоднай вайны і прызначаных для абароны ад савецкага нападу. Хоць аб’екты ўсё роўна пацярпяць ад прамога трапляння ракеты або трапляння ў межах 300 метраў, боегалоўка, скінутая далей за гэтую адлегласць, хутчэй за ўсё, пакіне структуру непашкоджанай.

Некаторыя цэнтры апрацоўкі даных займаюць тысячы квадратных метраў, і іх цяжка размясціць пад зямлёй, але кампаніі ўсё роўна могуць захоўваць значны аб’ём даных у падземных шматпавярховых збудаваннях. Карпаратыўны серверны вузел памерам прыкладна з дзве скрынкі для піцы можа захоўваць дзясяткі тэрабайтаў даных. Між тым, адзін тэрабайт можа змясціць увесь блакчэйн біткойна і пакінуць месца для захоўвання фатаграфій.

Аб’екты працуюць незалежна — самі выпрацоўваюць энергію, фільтруюць паветра і вырабляюць ваду. Яны атрымліваюць энергію з некалькіх крыніц, уключаючы дызельныя бакі, ветравыя турбіны, акумулятарныя батарэі і ядзерныя рэактары, а гэта азначае, што ў выпадку катастрофы цэнтр зможа працягваць працу як мінімум некалькі гадоў, сказаў Хол.

Паводле слоў экспертаў па бяспецы, існуюць значна таннейшыя спосабы абароны інфраструктуры цэнтра апрацоўкі даных, якія не патрабуюць яе пахавання. Кампаніі могуць распаўсюджваць свае даныя па розных аб’ектах, таму, калі штосьці здарыцца з адным цэнтрам апрацоўкі даных, інфармацыя не будзе страчаная.