LeverX адкрыла офіс у Латвіі

Кампанія называе гэтую падзею важным крокам у сваёй доўгатэрміновай стратэгіі па пашырэнні ў Паўночнай і Усходняй Еўропе, а таксама для замацавання статусу аднаго з галоўных гульцоў SAP-экасістэмы.

LeverX мае намер стварыць магутны тэхналагічны хаб у краінах Балтыі і Паўночнай Еўропы. Адкрыццё офіса дазволіць ёй быць бліжэй да кліентаў і наладжваць працяглыя партнёрствы, а таксама рабіць унёсак у інавацыі ў прыватным і дзяржсектары.

Кампанія хоча сфармаваць больш шчыльныя сувязі з мясцовай ІТ-супольнасцю і даць айцішнікам магчымасць паўдзельнічаць у міжнародных праектах. Таксама яна будзе паглыбляць працу з латвійскімі ўніверсітэтамі і адукацыйнымі ініцыятывамі, каб вырасціць тут новае пакаленне ІТ-спецыялістаў.

Таксама ў рэлізе адзначаецца, што з Рыгі родам сузаснавальнік і гендырэктар LeverX Віктар Лазінскі.

LeverX налічвае больш за 15 офісаў па ўсім свеце. Кампанія прысутнічае і ў Беларусі. Але на сваім сайце беларускія офісы не ўзгадвае.