Лідар у ШІ змяніўся: інвестары стаміліся ад OpenAI і цяпер робяць стаўкі на Google

Паводле апытанняў Bloomberg, на гэтым фоне фаварытам інвестараў робіцца Alphabet: з устойлівым грашовым патокам, уласнай інфраструктурай і моцнымі пазіцыямі па ўсім ланцугу ШІ-прадуктаў.

Яшчэ нядаўна любое ўзгадванне OpenAI падштурхоўвала ўверх акцыі яе партнёраў. Цяпер сувязь са стартапам працуе як «якар»: паперы Oracle, CoreWeave, AMD, Nvidia, Microsoft і SoftBank апынуліся пад ціскам.

Індэкс кампаній, звязаных з OpenAI, вырас з пачатку года на 74%, але гэтага мала на фоне кампаній, якія працуюць з Google: іх аналагічны рост дасягнуў 146%.

Нагодай для астуджэння стаў жнівеньскі рэліз GPT-5, успрыняты неадназначна. Сітуацыю пагоршыў лістападаўскі запуск абноўленай мадэлі Google Gemini, якая атрымала захопленыя водгукі.

Паводле дадзеных Bloomberg, пасля гэтага кіраўнік OpenAI Сэм Альтман абвясціў унутры кампаніі «код чырвоны» і запатрабаваў сканцэнтравацца на павышэнні якасці ChatGPT.

Эксперты лічаць, што інвестары пачалі інакш ацэньваць маштаб рызык, звязаных з OpenAI — ад даўгавой нагрузкі да кошту інфраструктуры, якую абслугоўваюць Oracle, AMD і Nvidia.

Паводле разлікаў HSBC, выдаткі кампаніі могуць перавысіць яе выручку на $207 мільярдаў да 2033 года. На гэтым фоне расце трывога: у выпадку правалу OpenAI рызыкі перакінуцца на ўвесь рынак, улічваючы глыбіню яе партнёрскіх сувязяў.