Лідарства OpenAI пачынае прасядаць праз 3 гады пасля рэліза ChatGPT

Google, які яшчэ год таму лічыўся безнадзейна адсталым, рэзка скараціў дыстанцыю. Пасля летняга рэлізу інструмента Nano Banana аўдыторыя мабільнай аплікацыі Gemini вырасла да 650 мільёнаў чалавек.

Выхад мадэлі Gemini 3 Pro дазволіў Google абысці GPT-5.1 у тэстах на агульныя веды, а ўласныя TPU-чыпы далі магчымасць трэніраваць мадэлі без залежнасці ад дарагіх GPU Nvidia.

На гэтым фоне капіталізацыя Alphabet наблізілася да $4 трыльёнаў, а сама кампанія ўпэўнена ў здольнасці ўкараняць ШІ ў свае масавыя сэрвісы: ад пошуку да Android.

Унутры OpenAI расце трывога, адзначае Financial Times. У лістападзе Сэм Альтман папярэдзіў супрацоўнікаў, што дасягненні Google могуць прывесці да кароткатэрміновых эканамічных цяжкасцяў, а «атмасфера будзе напружанай».

Супрацоўнікі, паводле дадзеных FT, адчуваюць ціск: ім даводзіцца канкураваць з кампаніямі, якія гатовыя ўкладваць у ШІ дзясяткі мільярдаў даляраў. Нягледзячы на тое, што OpenAI захоўвае найбуйнейшую аўдыторыю — больш за 800 мільёнаў карыстальнікаў — людзі праводзяць больш часу ў Gemini, чым у ChatGPT.

Anthropic становіцца трэцім ключавым гульцом. Кампанія прыцягвае карпаратыўных кліентаў акцэнтам на бяспеку, а яе мадэль Opus лічыцца лепшай у сферы праграмавання. Microsoft і Nvidia разглядаюць інвестыцыі да $15 мільярдаў пры ацэнцы прыкладна $300 мільярдаў. Anthropic актыўна расце і рыхтуе новы амбіцыйны раўнд.

Галоўная складанасць для OpenAI — велізарныя інфраструктурныя выдаткі. Кампанія абавязалася ўкласці $1,4 трыльёна за восем гадоў у вылічальныя магутнасці, заключыўшы ўгоды з Nvidia, Oracle, AMD і Broadcom.

Каб апраўдаць такія ўкладанні, OpenAI разлічвае на сотні мільёнаў платных падпісчыкаў, развіццё рэкламы — у тым ліку ў Sora — і пашырэнне камерцыйных функцый у ChatGPT.

Аднак апытаныя эксперты лічаць, што кампанія можа быць занадта распылена: яна адначасова развівае Sora, Atlas, інструменты для праграмавання і мноства новых мадэляў, што ўскладняе ўтрыманне якасці.

Тым не менш, на думку назіральнікаў, спісваць OpenAI рана. Шырокая лінейка прадуктаў можа дапамагчы кампаніі адкрыць новыя крыніцы даходу і фінансаваць даследаванні, а хутка растучы рынак ШІ пакідае прастору для поспеху адразу некалькім гульцам.