Літва не выпускае ў Беларусь пасажыраў з 60+ еўра ў гаманцы. Што адбываецца?
Апошнімі тыднямі беларусы паведамляюць у памежных чатах, што літоўскія мытнікі на выездзе з краіны сталі старанна правяраць наяўныя грошы ў пасажыраў, піша Onliner. Калі ў кагосьці больш за 60 еўра, іх могуць развярнуць назад.
Яшчэ ў 2022 годзе Літва ўвяла забарону на вываз банкнот еўра, аднак дакладная сума ў 60 еўра тады была прыбраная з афіцыйных дакументаў. Да нядаўняга часу асаблівых праблем з вывазам наяўных не ўзнікала. Але ў жніўні 2024 года сітуацыя змянілася: мытнікі зноў сталі правяраць гаманцы пасажыраў і высаджваць тых, у каго з сабой больш за дазволеную суму.
Што кажуць вандроўнікі?
— Прайшлі мяжу цяпер на аўтобусе, кіроўца прасіў праверыць, каб у гаманцы не было больш за 60 еўра, шукаць, сказаў, ніхто не будзе, — дзеліцца досведам праходжання мяжы беларуска.
— Вядомая рэч, абмежаванні па 60 еўра — гэта з боку літоўскай мытні. Беларусь пускае да $10 000 або 9200 еўра, а Літва з еўра не пускае і разварочвае назад, — піша іншая турыстка.
— Некаторыя мытнікі называюць дазволеную суму ў 0 еўра, тлумачаць гэта тым, што ў РФ і РБ еўра не патрэбныя, яно не з’яўляецца нашай валютай, кажуць, вязіце або долары, або мяняйце на рублі. Рэальна былі выпадкі, напрыклад, на эстонскай мяжы, што не прапусцілі 30 еўра, адправілі мяняць, усё залежыць ад шкоднасці канкрэтнага мытніка. У Літвы ліміт 60 еўра на чалавека, — піша ўдзельнік чата.
— Акрамя правілаў мытні Літвы, ёсць правілы Еўрасаюзу. І ў прынцыпе, калі трапіцца не вельмі мілы памежнік, то ні мяса, ні алкаголь, ні малочку ён не прапусціць. Як і кучу еўра, — піша яшчэ адная дзяўчына.
— Гэта патрабаванне ЕС. Забарона на вываз наяўных еўрабанкнот у Расію і Беларусь. Дазваляецца толькі мінімальна неабходная сума для асабістых патрэб. Мяркую, што мытня Літвы ўстанавіла гэтую суму як дастатковую на аднаго чалавека на адныя суткі. А далей — вашыя праблемы, раз вы выязджаеце з ЕС, значыць, у вас ёсць іншыя крыніцы забеспячэння сваіх патрэб. Ну гэта мая версія. А калі прасцей, то бярыце долары, да іх пытанняў у літоўскай мытні няма, — расказвае іншы карыстальнік.
Паводле інфармацыі з памежных чатаў, часам важна, каб у гаманцы было не больш за 60 еўра. Колькасць наяўных у іншых валютах не абмежаваная. Якім будзе дагляд, залежыць ад настрою змены, бывае, што гэтая працэдура праходзіць хутка і без асаблівай увагі да наяўных. Аднак перавозчыкі ўсё ж раяць улічваць абмежаванні і быць гатовымі да праверак.
Читать на dev.by